|
|
Hargeysa(Berberatoday.com)-Gudoomiyaha golaha guurtida Somaliland Saleebaan Maxamuud Aadan ayaa ka hadlay dib u dhaca guddida doorashadu shaacisay ee ku imanaya doorashadii baarlamaanka iyo colaada ka taagan deegaanka Ceel Afweyn ee gobolka Sanaag.
Gudoomiye Saleebaan ayaa sheegay in hadii ay duruufi timaado ay golaha guurtidu samaynayaan mudo kordhin, waxaanu baaq u diray bulshada colaadu ku dhexmarayso deegaanka ceel Afweyn ee gobolka Sanaag.
Gudoomiye Saleebaan oo ugu horayn ka hadlaya dib u dhaca doorashada ayaa waxa uu yidhi “marka ay timaado golaha guurtida ayeynu arkaynaa , aniga waxba imay soo gaadhin, golaha guurtiduna markaas ayuunbuu ka talin, doorashaduna insha allah dib u dhici mayso laakiin hadayse duruufi keento waa la kordhin.”Ayuu yidhi gudoomiye Saleebaan oo la hadlay bulshotv.
Sidoo kale waxa uu baaq u diray beelaha colaadu ku dhexmarayso degmada Ceel Afweyn ee gobolka Sanaag “Dadkaas bariga waxaan leeyahay nabad qaata oo is dhawra oo xanaanaysta oo walaalooba anagana warwarka iyo walaaca naga daaya, intaas aad is dilaysaan anaguna waanu naxaynaa oo ma nabad qabno.”
Berberatoday.com