Safiirka Dawladda Turkiga Ee Somaliya Oo Markii Ugu Horeysay Ka Hadlay In Ciidamo Somaliyeed La Geynayo Libya
August 5, 2020 - Written by admin
Ankara(Berberatoday.com)-Safiirka dowladda Turkiga ee Sooomaaliya Mehmet Yilmaz oo wareysi siiyey wakaaladda wararka Anadolu Agency, ayaa markii ugu horeysay ka hadalay warar sheegayey in ciidamo Soomaali ah la geynayo dalka Libya, si ay uga barbar dagaalamaan dowladda taagta daran ee Libya oo dagaal adag kula jirta maleeshiyaadka uu hoggaamiyo Jeneraal Khaliifa Haftar.
Danjire Yilmaz ayaa sheegay in wararkaas ay faafinayaan dalal cadow ku ah dowladiisa Turkiga, waxuuna ku tilmaamay been abuur.
“Baraha bulshada Soomaaliya waa kuwa aad u xooggan. Waxaan ka aragnaa dadaallo ay dalalka qaar wadaan oo ay dantooda ku fulinayaan. Waxaan u aragnaa arrintan olole qorsheysan. Wararka ma ahan kuwa run ah, waxba kama jiraan,” ayuu yiri Safiirka Turkiga ee Soomaaliya Mehmet Yilmaz.