Ciidanka Madaxtooyada ayaa subaxnimada saakey ah tegey xerada kabka oo ay dib ugu soo noqdeen kuwii xaley laga saarey, waxaana ay halka ka cayriyeen malayshiyaadkii, kadib waxaa goobta yimid maamulka gobolka iyo qaybo ka mid ah saxaafadda, markii maamulka gobolka meesha ka tegey.

Hase-yeeshee, wax yar ka dib waxaa yimid gaadhi kale oo Malleashiyaadkii Xerada haysan jirey wateen, waxaana ay rasaas ku fureen ciidanka madaxtooyada oo weli ku sugannaa goobtaas.

Waxaa isla goobtaas ku dhaawacmey Col. Cismaan Cumar Maxamed Taliyihii ciidanka watey, waxaana uu u geeriyoodey dhaawicii soo gaadhey wax yar ka dib markii Cusbitaalka la geeyey.

Sidoo kale, weerarkaas Malleeshiyada hubaysani dib u soo qaadeen, waxaa ku nafwaayey Askeri kale oo ka tirsanaa ciidanka madaxtooyada, waxaana ku dhaawacmey weerarkaas illaa afar Askeri oo kale.

Xerada Kabka waxa hore uga dhacay dagaallo badan, bishii Diseember 2018 iyada oo maamulkii markaas jirey doonaayey in uu gado xerada ayaa waxaa ku dagaalamay, laba malayshiya oo ka soo kala jeeda qabiilada dega gobolka Mudug

Col. CIsmaan Itoobiyaan, ayaa hore uga soo shaqeeyey ciidanka Dowaldda federaalka Soomaaliya, Madaxweynaha Puntland, ayaa bishii May 2020 u magacaabey xilka Taliyaha ciidanka madaxtooyada ka dib markii Taliyihi hore is casiley.

Allaah ha u naxariistee Cismaan Cumar Maxamed, ayaa muddo kooban hayay xilka Taliyaha Ciidanka madaxtooyada Puntland, waxaana Qoyska, ehelada, qaraabada, Asxaabta iyo Ciidanka Puntland-na geeridiisa ka tacsiyadeeyey, Madaxweynaha Puntland iyo Maamulka Mudug ee Puntland

Berberatoday.com