Halka sannaadkii Saddexaadna ay usoo gudubtay inay Xayiraado kusoo rogto Hay’addo Warbaahineed, oo uu weli barbar socdo xadhiga Saxafiyiinta. Sidoo kalena waxa ay sannaadkeedii Afarraad af-gembiday Ururkii u dhaqdhaqaaqi jiray xoriyadda Saxaafadda Somaliland kana difaaci jiray tacadiyada ay xukuumaddu u geysato, kaasoo ay gacanta u gelisay koox ka amar qaata madaxtooyadda, isla markaana sida rammuudka saxaafadda loo adeegsado.

Dhamaan tallaabooyinka ay xukuumaddu qaadeysay waxa ay ahaayeen kuwo ay ku mashqicineysay Hay’adaha warbaahinta, waxana aakhirkii ay Saxaafadda ka Somaliland ku rabbeysay inay ka dhigto kuwo aan xor ahayn si madaxbaanna wax u baahin, maanta Somaliland kama soo baxo, Wargeys keliya oo si Xor ah usoo gudbiya dhacdooyinka maalin-laha ah ee ka dhaca, sidoo kalena ma jiro Tv keliya oo isna dhacdo musuqmaasuq soo bandhiga, waxa keliya ee hadda si xor u dhow wax usoo tabiyaa waaWarbaahinta Online-ka ah oo keliya, kuwaasoo ay laftooda dagaal caddaan ah ku hayso habeen iyo maalin-ba.

Haddaba, Xukuumadda tallada haysaa waxaay Warbaahintii ay rabbeysatay ka dhigtay kuwo iyada u adeegga oo lagu aflagaadeeyo madaxda Xisbiyadda Qaranka, kuwaasoo la kala qaabilsiiyey midba shaqsi, Tusaale ahaan, akhriste Wargeyska Beenta iyo Cayda Murrashax Jamaal Cali Xuseen caadeystay ee lagu magacaabo Faaruq( Foore) waxa isaga lagu masruufa cayda iyo ceebeyta Jamaal Cali Xuseen, waxana Waraaqaha iyo kharashka ka bixiya madaxtooyadda iyo qaar kamid ah gacan-yarayaashiisa, oo xilal ka hayaa Xukuumadda, kuwaasoo ay kamid yihiin Wasiirka Beeraha Dr Maxamed Aw Daahir iyo sidoo kale, haweenay ku cusub xayn daabka madaxtooyadda oo dhowaan laga dhigay agaasimaha Madaxtooyadda Marwo Khadra Geydh, waxana laba masuul ay isku hayb guud yihiin Wiilasha mihnadooda ka sinneystay ama hunguriga u isticmaalay.

Waxa kaloo, iyana jira warbaahin iyadana loo adeegsado Cayda Xisbiga kale ee waddani, laakin iyaga waxaad moodda in damiirkoodu weli yara nool yahay oo iyagu ma baahiyaan Been caddan ah, sida Wargeyska Faaruq (Foore) oo kale. Sidaa daraadeed bulshada in kastoo ay si fiican u taqaan warbaahinta xorta ah ee la ruumeysto, haddana waxaan u sheegaya in Wargeyska Faaruq(foore) aanay haba yarataee, wakhti iskaga lumin akhriskiisa, sidoo kalena aanay Iibsanba. Waa bilahi Tawfiiq.

Qaasim Abokor Cali

Hargeysa/Somaliland