|
|
Dr. Xaglo-toosiye oo Weli ku sugan Buuhoodle oo u taag waayay Qadiyadda Galaydh iyo Kooxdiisa
Buuhoodle(Berberatoday.com)-Dr. Cali Khaliif Galaydh oo ku Magacaaban Madaxweynaha Kooxda la baxday Khaatumo oo toddobaadkii hore uu Wasiirka Caafimaadka Somaliland Dr. Saleebaan Ciise Axmed (Xaglo-toosiye) sheegay inuu Magaalada Buuhoodle ka baxay, ayaa Shalay socod dhoolatus ah ku soo maray Waddooyinka Magaalada Buuhoodle, Sayladda Xoolaha iyo Meheradaha Ganacsiga ku yaalla Magaalada Buuhoodle.
Dr. Galaydh oo ay socodkiisa ku wehelinayeen Xubno ka mid ah Kooxda Khaatumo ee ku sugan Magaalada Buuhoodle, ayaa waxa dibadda ugu soo baxay Dadweyne ka mid ah kuwa ku dhaqan Magaalada Buuhoodle kuwaasi taageero u muujinayey.
Dr. Cali Khaliif Galaydh, oo Socodkiisa ka dib la hadlay Warbaahinta Kooxdiisa taageerta, ayaa hadalkiisa ku bilaabay Weedho lid ku ah Qarannimada Jamhuuriyadda Somaliland, “Soomaaliya ha noolaato’ ayuu hadalkiisa ku bilaabay Dr. Galaydh oo muujinaya Kalsoonida uu ku qabo joogitaankiisa Buuhoodle, waxaanu intaa ku daray, “Hadhow bay wax kale sheeg-sheegi ee Buuhoodle waxay tahay indhihiina ayaad ku aragtaan.”
Wasiirka Caafimaadka Somaliland Dr. Saleebaan Ciise Axmed (Xaglo-toosiye) oo toddobaadkii hore isagoo ku sugan Magaalada Buuhoodle la hadlay Warbaahinta, ayaa sheegay inay Magaalada Ka saareen Cali Khaliif Galaydh isla-markaana aanay dib ugu ogolaaneynin inuu ku soo laabto, laakiin socodka uu Galaydh Shalay ku maray Waddooyinka Buuhoodle, ayaa muujinaysa in hadalkaa hore ee Xaglo-toosiye aan Run wada ahayn.
Berberatoday.com