|
|
Riyad(Berberatoday.com)-Waxaa geeriyooday Duuliye lagu magacaabo Waliid Bin Maxamed Almoxamed xili uu kaxeynaayay diyaarad ku jirtay hawada sare.
Diyaarada uu waday Waliid Bin Maxamed, ayaa laga lahaa dalka Sacuudiga waxaana xiligaasi diyaarada la socday labaataneeyo rakaab ah.
Diyaarada uu waday Waliid Bin Maxamed ayaa waxa ay ku shaqeyneysay laba matoor, waxa ayna xiligaasi kasoo duushay Garoonka Diyaaradaha ee Degmadda Casir ee Koonfur galbeed Sacuudiga, iyada oo kusii jeeday Garoonka Caalamiga ee Boqor Khaalid oo ku yaalla caasimadda dalkaasi ee Riyadh.
Waliid Bin Maxamed ayaa nafta ka baxday ka hor inta uusan diyaarada dajin waxaana durbadiiba la wareegay xakameynta diyaarada nin u ahaa caawiye kaasi oo xidhiidh la sameeyay xarunta laga maamulo Diyaaradaha Sacuudiga waxaana lagu amray in si dhaqsi ah uu ku dajiyo diyaarada.
Inta ay hawada ku jirtay waxaa qalqal iyo cabsi badan ay lasoo daristay rakaabkii oo aaminay in waqtigooda uu halkaasi ku dhamaaday, hayeeshee waxa uu caawiyaha ugu danbeyntii ku guuleystay dajinta diyaarada.
Maamulka Xarunta ayaa guul kadib rakaabka ugu hambalyeeyay inay kasoo badbaaden xaalad qatar ah oo ay hawada ku galeen.
Berberatoday.com