Canbaareyn Wadareed Mug leh oo ku wajahan Xadhiga Xaqdarada ah ee Saqdii dhexe Ciidanka RRU-du xabsiga ugu taxaabeen Hooyo Saado Jaamac Adan ( Saado Dheer )‏

March 17, 2016 - Written by Berbera Today

Anaga oo ah Qurbejoogta reer UK ee ka soo jeeda Gobolka Saaxil iyo nawaaxigiisa, Waxaanu Canbaareyn mug leh Xukuumada Siilaanyo ku Canbaareyneynaa Xadhiga xaqdarada ah ee lagula kacay Hooyo Saado Jaamac Adan ( Saado Dheer ) oo sife argagixiso leh oo baal marsan xeerarka dalka uyaala ay Ciidanka RR-U gurideedii ugu daateen ulana baxeen saqdii dhexe ee Habeenimo.

Xadhigan Xaqdarada ah ee lagula kacay Hooyo Saado Jaamac Adan xal u noqon mayso xiisada ka taagan Gobolka Saaxil magaaladiisa Berbera ee waxay ku sii kordhinaysaa shacabweynaha reer Saaxil gaar ahaan Magaalada Berbera dareen dheeraad ah kaa soo hindhisi doona Gadood cusub iyo Kacdoon dadweyne oo ku baaha guud ahaan gobolka Saaxil iyo dhamaan Gobolada Dalka oo dhan . Waxaana ay cabudhintaa iyo cago jugleyntaa Berbera ka taagani sii hurin doontaa oo sii shidaalin doontaa xiisada Huursan ee hada ka aloosan Golobka Saaxil Caasimadiisa Berbera.

Waxaanu Xukuumada Siilaanyo ku wargelineynaa in maanta oo ay taariikhdu tahay 17/3/2016 aanu Hooyo Saado Jaamac Adan oo xadhigeedii lagula dhaqmay sife baal marsan Diinta islaamka iyo shuruucda dalka uyaalaa aanu u gudbinay maanta 5-ta Hayadood ee u Dooda Xaqdarada lagula kaco Xoriya-tulqawlka iyo xuquuqul insaanka gaar ahaan Dumarka iyo dadka Maatada ah, Hayadahaas oo ay ugu horeyso Amnesty International. Waxaanu leenahay Xukuumada Siilaanyo waa in sida ugu dhakhsaha badan xoriyadeeda oo buuxda loogu soo celiyaa Hooyo Saado Jaamac Adan. Hadii denbi lagu hayana waa in sida ugu dhakhsaha badan sharciga dalka uyaala loo horkeenaa . Cabudhintaa degamsan, hanjabaada joogtada ah, Xadhigan xaqadarada ah, Xiisad sameynta iyo xaalad abuurka sii xoogeysanaaya ee Saameeyey Gobolka Saaxil waayadan danbe hadii aan la dejin oo aan loo maareyn sida ugu dhakhsaha badan waxay galaafan doontaa nabadgelyada guud ee gobolka oo dhan Waxaana uqoolan oo masuuliyadeeda qaadi doona ” Inta Dibirsan iyo inta Doobinaysa ee Dhibishaxleyneysa ee ku mamay ilihii dhaqaalaha ee ummadda Somaliland oo dhami wadalahayd .”

Allaa Mahad Leh

Gudida Joogtada ah

Ee Qurbe joogta Gobolka Saaxil

ee United Kingdom.