|
|
Hargeysa(Berberatoday.com)-Waxa maanta Hargeysa lagu xidhay Badhisaab ku xigeenkii gobolka Saaxil Xaamud Xuseen Cabdilaahi .Ma jiro war rasmi ah oo dawladda ka soo baxay oo xadhigan ku saabsan ,hasayeeshee ilo xogogaal ah ayaa sababta Badhisaab ku xigeenka loo xidhay ku tilmaamay mid la xidhiidha falkii lagu dilay taliyihii qaybta bilayska ee gobolka Saaxil Marxuum Cabdirizaaq Yuusuf Maxamud(Casayr) iyadoo ay xiligaa dilku dhacay ay marxuumka iyo badhi-saab-ku-xigeenku wada socdeen,waxaanu Kuxidhan yahay Xarunta C.I.D Hargeysa.
Badhasaabka Kuxigeenkan maanta xabsiga loo taxaaaya ayaa dhawaan xilkii Gudoomiye Kuxigeenimo laga qaaday iyada oo aan cid xilkaas loo soo magacaabay jirin Xaamud Xuseen cabdillahina aanu xilkaas wareejin uuna dalbaday inuu xilka ku wareejin doono cida loo soo magacaabo hase yeeshe warqada xilka lagaga qaaday ayaa lagu amray inuu xilka ku wareejiyo Gudoomiyaha gobolka Saaxil.
Dhinaca kale waxa isa soo taraya dhaliilo loo jeedinayo habka ay u waddo badhitaankii kiiskan iyadoo lagu eedaynayo inay arinta u maamulayso qaab qabyaaladaysan oo ka baxsan hanaankii dawladnimo ee loo baadhay kiisaskii hore ee lagu dilay saraakiil ka tirsan ciidamada .
Dhinaca kale ciidamada amaanka ee Berbera ayaa xalay la galiyey heegan buuxa ka dib markii la ogaaday inay jirto dablay hubaysan oo soo gashay magaalada Berbera kuwaas oo kasoo jeeda Jufada Taliyaha Geeriyooday isla markaana ay isku qarinayaan guri ku yaala mid ka mid ah xaafadaha magaalada.
Berberatoday.com