|
|
Hargeysa(Berberatoday.com)-Kulan garnaqsi ah oo ay shalay isku soo hor fadhiisteen komishanka doorashooyinka qaranka Somaliland iyo xukuumadda, ayaa guddida komishanku shuruudo adag ku xidheen in ay u hoggaansamaan hakinta diiwaangelinta codbiyeyaasha Somaliland oo maalin ka hor ay isla qaateen xukuumadda, labada gole baarlamaan, xisbiyada KULMIYE iyo UCID, halka sida oo kale hakintaas uu ka soo horjeestay xisbiga WADDANI, ka dib kulan qasriga madaxtooyada uu ku shir-guddoominaayey madaxweynaha jamhuuriyadda Somaliland Md.Axmed Maxamed Siilaanyo.
Wararku waxa ay intaas ku darayaan in xubnihii xukuumadda kulankaas u metelaayey ay ka gowsadeygeen fulinta shuruudahaas, isla mar ahaantaana u muuqday kuwo aan diyaar u ahayn in ay damaanad qaadaan eeda gaarka ah ee xukuumaddu ay ku damaanad qaadayso dib-u-dhaca ku imanaaya doorashooyinka Somaliland iyo weliba sida oo kale bixinta kharashaadka la khasaarayo diiwaan-gelinta mudada bisha ah dib loo dhiggaayo.
Dhinaca kale, wararku waxa ay tibaaxayaan in komishanka doorashooyinka qaranka Somaliland, ay xukuumadda ku eedeeyeen in ay afduubtay kulankii uu shirguddoominaayaye madaxweynaha Somaliland, isla mar ahaantaana aan laga qaybgelin inay talo ku yeeshaan go’aanka laga qaadanayo hakinta diiwaangelinta codbixiyeyaasha iyo doorka ay ku leeyihiin.
Berberatoday.com