|
|
Suria(Berberatoday.com)-Kooxda Daacish ayaa lagu soo waramayaa inay afduubatay dad gaaraya 300 oo kamid ahaa shaqaalaha Warshad shamiintada soo saarta oo ku taal wadankaasi Siiriya.
Dadkan ayaa laga afduubtay magaalada Dumayr oo 50km dhanka bari uga beegan caasimada Dimishiq.
Warshada ay ka shaqeenayeen shaqaalaha oo lagu magacaabo Al Badia Cement company ayaa dhankeeda sheegtay in tirada shaqaalaha laga qafaashay ay gaarayaan 250 qof. Waxaana muuqata inuu jahwareer ka jiro xogta ku aadan tirada dadka ay qafaalatay kooxda Daacish.
Wakaalada wararka ee Reuters ayaa maanta oo Jimce ah shaaciyey war sheegaya 175 la afduubtay dhamaantood ay dileen maleeshiyaadka Daacish, balse warkan ayey markii danbe Reuters dib ulla noqotay.
Qaar kamid ah warbaahinta Siiriya ayaa xalay sheegayey in qaar kamid ah dadkaasi ay kooxda Daacish qoorta ka jartay, iyadoo aan la heyn xog sugan oo ku aadan halkii ay ku danbeeyeen dadka u gacan galay ISIS.
Berberatoday.com