|
|
Muqdisho(Berberatoday.com)-Ciidamada Maamul goboleedka Koonfur Galbeed Somaliya ayaa shalay fashiliyay qaraxyo la doonaayay in weeraro loogu gaysto Magaalada Baydhabo xarunta Gobolka Baay.
Ciidamada, ayaa waxay isu gadaameen guryo ku yaalla inta u dhaxayso wadada isku xidha magaalooyinka Baydhabo & Buurhakaba, gaar ahaan deegaanka Raydable. Waxayna amar ku bixiyeen inay isa soo dhiibaan nimankii weerarada ku diyaarinaayay guryahaasi, waxayna ka biyo diideen inay sharciga isku soo dhiibaan.
Sidoo kale, illaa sagaal nin oo guryahaa ku sugnaa ayaa waxay dagaal kala horyimaadeen ciidanka maamulka Koonfur Galbeed, iyadoo markii ay rasaasta ka dhamaatayna ay lix nin oo ka mid ahaa isqarxiyeen, halka nolosha lagu soo qabtay saddexdii kale. Ciidanka, ayaa sidoo kale waxay gacanta ku soo dhigeen suumanka ka samaysan walxaha qarxa, qoryo iyo rasaas, iyagoo u soo qaaday dhinaca Magaalada Baydhabo.
Taliyaha Ciidanka Nabad Suggida Ee Baydhabo, Maxamed Isaaq Ibraahim (Aflow), ayaa sheegay in ay helayn macluumaadka ku saabsan raggaasi, islamarkaana ay la wadaageen ciidanka sida gaarka ah u tababaran ee Koonfur Galbeed, kuwaa oo ku guuleystay buu yidhi inay fashiliyaan weeraradii kooxda Ugus.
Taliyaha ayaa sheegay in saddexda nin ee ay gacanta ku soo dhigeen inay yihiin Amiirro ka tirsan Al-shabaab, ayna hadda ay ku hayaan xarumaha nabad-sugiddu ay ku leedahay Magaalada Baydhabo.
Ugu dambeyn, Aflow oo la hadlayay Warbaahinta ayaa bulshada kaga mahadceliyay wada shaqaynta ay la leeyihiin laamaha ammaanka ee Gobolka Baay, wuxuuna ku booriyay inay sii wadaan xidhiidhka ka dhexeeya Hay’adda NISA, maadaama ay shabaabku yihiin koox si guud u dhibaataynaysa shacbiga Soomaaliyeed.
Berberatoday.com