Ma ..Weecsin iyo Beegsin mise.. Aloos iyo Agaasin Danbe oo sii hadha  !! Ma Qataabsi iyo Qurbaani.. Mise Qadhaabsi iyo Qudh-Qudho joogto ah ?   ! Mise Gown iyo Maquuno kale  !!  Boowe …Malaa….Waa Qaliban !! Mise ….Waaba Suke ! Mise …Waaba Deman iyo Dirham-quud !! Mise Xaalku waa Doog dhabasho iyo Doogsin carar !! intaasina waa iga arar dadab-galkeedii ee bal aan hoos u soo dego !!……. !!

inaga oo bud-dhig iyo baleysin la inoogu garaabo uga dhigayna hadaladii iyo hawraartii maalmahan loo adeegsanaayey Heshiiskii Wareejinta Dekeda Berbera oo Xogtiisii  lagu mergaday, inaga oo weliba sii tix-raacayna tixdii iyo tiraabtii laga tiriyey kuna bishilayna hadal haynta DBW iyo hadaaqa bulshada bal aynu Tooshka ugu yara  shidno ummadda !!

Kuy’e Shirkada DPW waxay dekeda Berbera ku maalgelinaysaa aduun lacageed oo gaadhaaya $442 million.

Lay’e  Shirkadda DP World waxay dekeda berbera maamuli doontaa muddo dheer oo dhan 30 Sannadood.
Kuye’  Somaliland  waxaynu Shirkada DPW kula shuraakoobaysaa qiimaha Dekeda  oo ah % 35 inta kalena DPW ayaa iska leh

Lay’e hadana Dekeda Berberi waxay soo saartaa sanadkiiba  $130 Million ilaa iyo  150 Million

Kuy’e Markaad ku dhufato 10 sanadood oo qudha waxaa kuu soo baxaaya in qiimaha Dekedu yahay $1.3 Billion – 1.5 Billion

Lay’e Xukuumadu waxay Dekeda ku  qiimaysay  qiimo aad u hooseeya oo qaadhaaya $ 100 Milion oo keliya

Kuy’e 65% sheerarka waxaa qaadanaya shirkada DPW, 35% waxaa qaadanaya Berbera Port Authority Somaliland

Lay’e  Gudida Maamuli doonta Dekada wuxuu noqon doonaa 7 xubnood oo 5ni waa DPW  2na waa BPA Somaliland

Kuye  Shirkada cusub ee la Sameyn doono waxaa loo bixin doonaa magaca Berbera Port Operation Company ( BPOC)

Kuye  Shirkada cusub ee la Sameeyo waxaa maamulaysa oo keliya DPW oo iyada ayaa yeelanaysa Maareeyaha iyo Maareeye ku xigeenkaba.

Lay’e  Shirkada cusubi waxay kordhin doontaa cashuurta sanadkiiba laba goor si ay ula tar-tanto Dekedaha dallalka deriska ah

Lay’e xaga sharciga (Govering law ) waxaa la adeegsan doonaa shuruucda iyo xeerarka Ingiriiska

Kuy’e  xaga Xalinta khilaafaadka ( Dispute Resolusion ) hadii uu khilaaf yimaado oo la xalin waayo mudo 30 cisho gudahood ah waxaa la isla tegayaa sharciya UAE iyada oo la cuskanayo nuqulada shuruucda ee DIFC iyo LCIA.

Weli Aduunka lama arag oo lama maqal Maalgashi kan oo kale ah oo 30 sanadood ah oo  lagu maalgeliyo $430 million oo qudha , iyada oo lagu qiyaasay in Bekedu 10-kii sanadoodba ay soo saari karto $1.3 Million ilaa $1.5 Million.  Boowe, bal maxaa iyagana u maleynaysaan Qalabkaa 30-ka sanadood shaqaynaayey siduu u eekaan doono ileyn wuu daalaye,  Wuu hawlgabayaa oo daxaleysanayaa oo lagaaga guurayaa markuu heshiiska 30-ka sanadood ahi uu dhamaado ee  markaa  Muwaadin maxaad dhaxashay xaga Dekeda ?

Guntii iyo Gebagebadii :  Waxaa Golaha Baarlamaanka ee Somaliland laga codsanayaa oo looga fadhiyaa in ay shirkadaa  DBW iyo Xeerarkeeda u kuur galaan oo taxadar badan iyo wada tashi badan ka sameeyaan nuxurka ku duuwan heshiiskan ka gaadhsiiska ah ee lagu Sadqeynaayo Dekeda Berbera oo aheyd ibtii dhaqaale ee habaysay Qaranka Somaliland.

La soco tirsiga 4-aad  iyo nuxurka qarsoon ee ku duugan Wareejinta Dekeda Berbera-        ——————————–??