|
|
Badhasaabka Gobolka SOOL Oo Wargeyska Himilo Uga Warramay Dagaalka Alloosan, Wuxuu Ka Dhashay, Dadka Ku Dhintay Iyo Xaaladda Wakhtigan
Laascaanood(Berberatoday.com)-Ciidanka Qaranka Somaliland, ayaa gurmad nabadeed u tagey deegaanka Dharkeyn-geeye oo ay dirir collaadeed ku dhexmartay laba beelood oo reer Somaliland ah, isla-markaana la wareegay Ammaanka guud ee deegaankaasi, iyadoo guddida nabadgelyada gobolka sool-na soo saartay go’aamo nabadda lagu sugayo.
Guddoomiyaha Gobolka Sool Mustafe Cabdi Ciise (Shiine) oo Wargeyska Himilo khadka taleefanka kula xidhiidhay Xalay, ayaa faahfaahin ka bixiyey xaaladda collaadeed ee ka alloosan deegaanka Dharkayn-geeye iyo guud ahaanba Gobolka Sool.
“Deegaanka Dharkayn-geeye oo 73km u jira Magaalada Laascaanood ayaa Duhurnimadii Jimcihii (dorraad) ayaa collaad sokeeye oo u dhaxeysa laba beelood oo kala ah Baharrarsame iyo Qayaad oo wada dega deegaanka Dharkayn-geeye uu dagaal ku dhexmaray, kaasoo ka dhashay in labadan beelood oo hore wax isaga dilay ay kala tirsanayeen Geel kiiskii, balse qollada Baharrarsame ay qawadeen, sidaa awgeed ayaa dagaalka labada beelood ku bilaabmay, waxaanay dhimashadu gaadhay isku-geyn labada dhinacba ilaa dhawr iyo toban qof, illaa haddana annagu ma kala caddeyn karo tirada ka kala dhimatay labada dhinac, balse saaka waaberigii (Shalay) ayaa ciidanka Qaranku gurmad nabadeed u tagey deegaankaasi, iyadoo dagaalku socdo, waanay kala dhex galeen oo ay kala eryeen, ilaa haddana waa nabad”.
Mustafe-shiine oo ka jawaabayey in dagaalka labadaasi beelood uu ilaa hadda socda ayaa waxa uu yidhi “Dagaalku wuu ka istaagay deegaanka Dharkayn-geeye, balse waxa hadda la soo sheegayaa inuu dagaalkii labadan beelood u dhexeeyey uu u wareegay tuullo u dhow deegaankaasi oo la yidhaahdo Dhumay.”.
Guddoomiyuhu waxa kale oo uu sheegay in Guddida nabadgelyada Gobolka Sool ay shir ka yeelatay shaqaaqadaasi soona saartay go’aamo nabadgelyo “Guddida Nabadgelyada Gobolka Sool ayaa fadhiisatay Shalay oo sugtay amnigii magaalada, isla-markaana go’aamisay in lagu soo rogo Laascaanood bandoo habeenkii, taasi oo ah in aanay habeenkii magaalada ka bixi karin gaadiid gurmad ahi, waxa kale oo aanu mamnuucnay inuu magaalada Laascaanood dhex maro qof shacab ah oo qori sita”.
Xigasho Wargeyska Himillo