|
|
Dadka Baro-kacay Cidna Weli Gurmad Bani-aadamnimo uma fidin
Sool(Berberatoday.com)-Dagaalkii Toddobaadkii hore labada Beelood ee Walaalaha ah ku dhex maray Deegaanka Dharkeyn-geeyo ee Koonfurta Gobolka Sool ee Somaliland, ayaa saameeyay Nolosha Dadka Deegaankaasi ku dhaqnaa, waxaanu keenay in Dad badan halkaasi ka baro-kacaan.
In ka badan 2000 Qoys oo ka mid ahaa Dadkii ku dhaqnaa Deegaannada Colaaddu ka dhacday ayaa u baro-kacay meelo kala duwan oo deegaannada Gobolka Sool ah, si ay uga baxsadaan dagaalkaasi oo socday muddo dhowr Maalmood ah.
Idaacadda Ergo oo baahisa Wararka ku saabsan Bani-aadamnimada, ayaa sheegtay in Dadka ka badan 2000 ee Qoys ee ka qaxay Colaadda Dharkeyn-geeyo ay wajahayaan Xaalad Bani-aadamnimo isla-markaana u baahan yihiin Gurmad deg-deg ah oo loo fidiyo, maaddaama oo ay ka baro-kaceen deegaannadii ay ku dhaqnaayeen ee ay ka helayeen quutal-daruurigooda.
Idaacadda oo soo xiganaysa Odayaasha deegaanka, ayaa sheegtay in Dadka ka badan 2000 Qoys ee baro-kacay ka dhalan karto Masiibo Bani-aadamnimo, sidaa daraadeedna gurmad u baahan yihiin, maaddaama oo aan illaa hadda wax taakulo ah aan la gaadhsiinin.
Wiil yar oo la hadlay Idaacadda Ergo, ayaa sheegay inaanu dhowr Maalmood waxba cunin, wax biyo ahna helin.
Dhibkaasi oo kalena ay qabaan Qoysaska kale ee deegaankaasi ka baro-kacay, kuwaasi oo ay ka mid yahay Hooyo umushay intii ay ku jirtay socodkii ay kaga soo baro-kacday deegaankeeda.
Berberatoday.com