Madaxwayne Xasan Sheekh, waxaa kale oo uu sheegay in doorashadaasi ay ka soo qayb gali doonaan Xubno ka tirsan Madax-dhaqameedka Somaliland si ay u soo xulaan xildhibaanada Maqaar-saarka ee Somaliland matalaya Doorashada Sanadkan.

Laakiin, Xukuumadda Somaliland oo ka hadashay hadalkaasi ka soo yeedhay Madaxwaynaha Somaliland ayaa ku tilmaamtay Hadalo aan meel haysan oo uu iska yidhi Xasan Sheekh Maxamuud.

Wasiirka Arrimaha Gudaha Somaliland Cali Maxamed Waran-cadde oo Shalay Warbaahinta Kula hadlay Magaalada Hargeysa waxaa Madaxwaynaha Soomaaliya ku eedeeyay inuu wado Dagaalo ka dhaca Geeska Afrika oo aanu caalamku u baahnayn, “Haddii uu Xasan Sheekh Nidaam sameynayo iyo haddii doorasho sameynayo, meesha uu madaxda ka yahay ee Muqdisho ayuu ka sameyn lahaa, Somaliland hore ayay uga go’day Somaliya Maantana arrimahaasi wax meesha yaala maaha.”ayuu yidhi Wasiirka arrimaha gudaha Somaliland, waxaanu intaasi daray oo uu yidhi “Somaliland madax-dhaqameedkeedu Rag waxaasi yeelaya maaha oo waa raggii halganka dalkan u galay, waa raggii dalkan dhisay, waa ragga maanta nadabadeedu ku dhisantahay annigu cidduu la hadlayo garan mayno.”

Wasiir Cali Warancade, waxaa uu sheegay in Madaxwayne Xasan Sheekh Dagaal ka wado Geeska Afrika waxaanu yidhi, “Xasan Sheekh Hadduu ku fikirayo Geeska Afrika inuu dagaalo ka bilaabayo oo aanay Xukuumaddiisa iyo Caalamkuba maanta u baahnayn, waxaanu markhaati uga dhigeynaa Caalamka wixii halkaasi ka yimaadda inuu isagu masuul ka yahay, waxaanu nahay dal isku kalsoon dawladnimadoodii dhistay, Qarankoodana ku filan inay ilaaliyaan”

Berberatoday.com