Maxkamad Ku Taalla Jarmalka Oo Xukuntay Rag Soomaali Iyo Tuusiiniyaan Ah Oo Al-shabaab Ka Tirsanaa

July 9, 2016 - Written by Berbera Today

Jarmalka(Berberatoday.com)-Shan Nin oo Saddex Ka Ka mid ahi yihiin Soomaali, ayaa Maxkamad ku taalla Dalka Jarmalku ku ridday Xukun u dhexeeya Saddex illaa Shan Sannadood oo Xabsi ah.

Shanta Nin oo Magacyadoodu kala yihiin Cabdillaahi, Cabdisalaan iyo Cabdiwaaxid oo asal ahaan Somali ah, Steven N iyo Mounir T oo iyaguna ka soo jeeda Dalka Tuuniisiya, ayaa Xeer ilaalinta Jarmalku ku eedeysay inay hore uga barbar dagaalameen Kooxda Al-shabaab ee Soomaaliya ka dhaqdhaqaaqda.

Shantan Nin oo dhammaantood haysta Dhalashada Dalka Jarmalka isla-markaana muddo ku noolaa Magaalada Bonn, ayaa la sheegay inay 2012-kii u safreen Dalka Kenya oo ay uga sii gudbeen dhanka Soomaaliya iyaga oo wata Xaasas iyo Carruurtooda, markaa ka dibna ka qayb-galeen Dagaallo kooxda Al-shabaab la gashay Ciidammada Dawladda Soomaaliya iyo kuwa Midowga Afrika ee AMISOM.

Raggan oo la qabtay markii ay ku laabteen Magaalada Frankfurt ee Dalka Jarmalka, illaa muddadaana ku jiray Xabsi ku yaalla Bonn, ayaa Toddobaadkan la hor-geeyay Maxkamadda, waxaana Maxkamaddu ku xukuntay Xabsi u dhexeeya 3 ilaa Shan Sanadood oo xadhig ah.