|
|
Hargeysa(Berberatoday.com)-Allaha u naxariistee waxaa maanta Xabaalaha masallaha ee magaalada Hargeysa lagu Aasay Cabaas Idiris oo markii hore la odhan jiray John Drysdale.
Marxuumka waxaa aaskiisa ka qaybgalay madaxwaynaha Somaliland Axmed Siilaanyo, wasiiro ka tirsan xukuumadiisa, xildhibaano ka socda baarlamaanka Somaliland, danjirrayaal iyo dhamaan qaybaha kala duwan ee bulshada ku nool magaalada Hargeysa.
Marxuum Cabaas Idiris, ayaa ahaa muwaadin Ingiriis, waxaana uu ka mid ahaa askartii Ingiriisku 1943kii usoo diray Somaliland si uu uga ilaaliyaan Gumeystihii Talyaaniga, Marxuum Cabaas markii Somaliland xornimada ka qaadatay Gumeystihii ingiriiska waxaa uu goostay inuu ku noolaada dhulka Somalida islamarkaana uu la shaqeeyo siyaasiyiintii wakhtigaasi ay is barteen wakhtigii Gumeystaha.
Marxuumku waxaa uu muddo ka badan labaatan sano ku noolaa Somaliland kaasi oo ahaa khabiir dhinaca beeraha, inta badana waxaa uu ahaa khabiir kala xadeeyay Soohdimaha beeraha Somaliland muddadii ay jirtay, waxaa uu bugaag ka qoray taariikhda Soomaalida, waxaana uu caan ku noqday Buuga la yidhaahdo “What ever happened to Somalia”.
Marxuum Cabaas Idiris waxaa uu diinta islaamka qaatay 2009kii markaasi oo uu magaciisii ahaa John Drysdale u badalay Cabaas Idiris, waxaa uu intaasi kadib aad ugu xidhnaa goobaha lagu barto diinta islaamka.
Marxuumka waxaa uu xaqii u yimid 10 Jully 2016 oo ku beegnayd maalintii Axada.
Madaxwaynaha Somaliland iyo Guddoomiyaha Xisbiga Kulmiye ayaa marxuumka ku sifeeyay shakhsi taariikh wayn ku leh Somaliland iyagoo Ilaahay uga Baryay inuu u naxariista samir iyo iimaana kasiiyo Ehelkii iyo qaraabadii uu ka baxay.
Berberatoday.com