|
|
Hargeysa(Berberatoday.com)-Kadib markii uu Abwaan Cabdiwaaxid Cali Gama’diid maanso ku taageeray weerarkii bishii December ee sanadkii hore lagu qaaday magaalada Paris ayaa waxaa ay ciidamada booliiska Somaliland xabsiga u taxaabeen Abwaankaasi 7 bishii 12 2015.
Abwaanka waxaa ay ciidamada Booliiska Somaliland kusoo oogeen dacwad nuxurkeedu ahaa inuu taageero u muujiyay kooxaha argagixisada ah kaasi oo maxkamada Gobolka Hargeysa Dacwad lagaga furay markii dambena maxkamadu ku xukuntay 4sano oo xadhig ah sida uu Wargeyska Himilo u xaqiijiyay kaalliye magaciisa ka gaabsaday.
Abwaan Cabdiwaaxid ayaa ku xidhan xabsiga Dhexe ee Magaalada Hargeysa halkaasi oo la sheegay inuu ku jirayo ama dhameysanayo mudada afarto sano ee maxkamada Gobolka Hargeysa ay ku xukuntay.
Gabayga uu Abwaanku ku taageeray Weerarkii lagu qaaday caasimadda Faransiiska ee lagu xidhay oo la yidhaahdo “Isha Cali U Fiirsada”, taas oo tuducyo ka mid ah ku taageerayo Weerarkaasi lagu hoobtay.
Abwaanka ayaa gabaygiisaas ku sheegay inuu soo dhaw yahay Nasri ay Muslimiintu sugayeen, waxaanu ku sifeeyey weerarkaasi Paris iyo kuwa la midka ahba kuwo hiil u ah muslimiinta lagu dhibaataynaya caalamka.
Gabayga lagu xidhay Abwaanka ayaa tuducyadeeda sida gaarka ah u taabanaya Weerarkii Paris waxa uu Abwaanku ku yidhi sidan:-
“Wax badan buu fidmo iyo Diin la’aan uumiyaha faraye
Wax badan buu fasaad, dhib iyo Qudhun ku foognaaye
Wax badan buu fasaxahay ceebta iyo ficilkii Reer Luude
Faransiis dhirbaaxada ku taal waa farriin culus
Tiro male bakhtiga fuurayee haadku fagayaaye
Alleylehe Rag foolaada oo fiican baa jaraye
Gaal oo dhan waakaa fajacay Xalay fiidkiiye
Waa kuwaa Faraqay Oohintoo taaba may filane..”
Abwaanku waxa kale oo uu Maansadan ku yidhi:-
Dakanadii Furqaan laga galaan Firiq la dhaafeyne
Fataaloo dhan Saaka Rasaas loola fiirsade
Fooxliyo Cilmaani iyo Basaas faasiqiyo Daalin
Saakay ku wada foorartaa furuq Alle u keenye
Futadaa Rag badan Gii’le oo maalal foofsaday
Murtad oo dhan Saakuu Fig iyo Gawrac filayaaye.”
Maansadii may ahayn gabeygii u horeysay ee Abwaan Cabdiwaaxid uu ku ammaano hawl-gallada kooxaha Adduunku Argagixisada u yaqaanno fuliyaan, laakiin sidan oo kale ayuu Maanso ugu amaanay weerarkii kooxda Al-shabaab ku qaadday Suuqa West gate ee Magaalada Nairobi sanadkii 2013-ka waxaana xabsiga u taxaabtay Xukuumadda Somaliland, inkasta oo markii la sii daayey haddana mar kale lagu xidhay Puntland waxaana xadhigaasi kasoo furtay Suldaanka Guud ee Somaliland Suldaan Maxamed Cabdiqaadir.
Xadhiga Abwaankan da’da yar ayaanay ka hadal xukuummada Somaliland iyo laamaha amniga Somaliland balse marar badan oo xabsiga lagu Booqday Abwaanku waxaa uu sheegay inay haystaan dad ay isku qaraabo yihiin.
Xigasho Wargeyska Himillomadia