Buuhoodle(Berberatoday.com)-Hoggaamiyaha Maamulka Khaatumo Prof: Cali Khaliif Galaydh, ayaa sheegay in Qabyaalad baaxad lihi ka jirto Buuhoodle oo ay Beelaha deegaanku ku kala awood-sheegtaan, waxaanu ku soo hal-qabsaday in Beesha Isaaq markii la aasaasay Jabhaddii SNM cidda Beelaha kale ah ee la socotay ugu yeedhi jireen Ayuha-Nebi, taasoo kalena ay wakhtigan ka dhex-taagan tahay Dadka Dhulbahante ee Buuhoodle wada jooga sida uu hadalka u dhigay.

Prof: Cali Khaliif Galaydh oo hadal ka jeediyey Xaflad lagu qabtay magaalada Buuhoodle, ayaa ka hadlay mar kale muhiimadda wadahadallada Somaliland iyo Khaatumo u bilaabmay u leeyihiin dadka iyo deegaanka Khaatumo ku abtirsada, waxaanu faahfaahiyey ujeeddada qasabtay iyo waxay Somaliland ka dhawrayaan ama ka rejaynayaan iyo weliba sababta kalliftay wakhtigan inay wadahadal la furaan Somaliland.