|
|
Maanso-Indha-daalis Curiye: Abwaan Axmed Aw Geeddi
Sagal soo indha-kuushiyo
Man ugbaadku tallaaliyo
Waqal soo onkodaayiyo
Ashkirow faraskii iyo
Aydin beel ku carrowdiyo
Ugaas geed ku shiraayiyo
Aroos baal laga taagey
Sitiyaal la afsaariyo
Indha-daalis la moodyey
Ma ifkaad ku dhaqnayd?
Uma baahnid ammaan
Iyo iidheh midkoodna
Ilaah baa ku dhammeeyoo
Idiley dhabankaaga
Meerayaasha iftiimiyo
Dayaxaa ashqaraaroo
Idilkood ku majeertee
Allow yaanay ku cawryin.
Oogadaadu xariir iyo
Qurux aadmi sameeyiyo
Uma baahnid Kiriimoo
Ugubey bilicdaada
Xiddigaha olkomaayiyo
Qorraxdaa anfariirtoo
Idilkood ku majeertee
Allow yaanay ku cawryin.
Ammin-khayrka salaadda
Adoo Iid tukanaaya
Markaad uunka salaantay
Ubax meel fog ku yaalliyo
Haldhaa toosay arooriyo
Daa’uus baad u ekayde
Afkuleeble kuhaaniyo
Asaaggaa kuma cawryo.
Hidde waa ku arooroo
Asli waa la toydaaye
Hooyadaa Indha-deeq
Afar baad la wadaagtay:
Aaddaney quruxdaada
Anshaxaaga wanaagsan
Aqalkiina dhexjoogga
Iyo waalid addeeca.
Egenkaad ku dhaqnaydiyo
Irdahaad ku barbaartiyo
Aabbahaaga wanaagsan baa
Dadka qaar og yihiinoo
Geyaankaa agahaagu
Way ku eeganayaanoo
Ergey soo dirsadeene
Yaan afkaagu ku ciilin.
Oosha taalla galbeedkiyo
Bari baa ku addeecoo
Ereygaaga quweeyoo
Balqiisey anshigaaga
Istanbuul gudaheediyo
Suldaan Ruun irdihiisiyo
Orobbaa laga naadshoo
Arrinkaagi fogaa.
Rag ninkii ku arkaana
Cishqi buu la ilmeeyoo
Xuural-cayntu adduunka
Haddii ay iman layna
Adigay noqon leydoo
Uumiyaha badda joogiyo
Kuwa ayda ku nool baa
Abidkaa ku bogaadsha.
Guurna waa istareexoo
Janno weeye adduuniyo
Ibo xoor laga maaliyo
Aqal weeye dugsoone
Wiilkii aad ulanaysee
Uurka aad ka jeclaydee
Waajibkii ka adkaadiyo
Ala-koodshe ha waayin.
Ayaankaa ma xumaadoo
Udubkaagu ma liicoo
Degelkaa ma abaadoo
Dadku kaama irdhooboo
Naftu kaama aguugtoo
Ubadkaa ubadkiisa
Wada goosta ardaayo.
Dhammaad