|
|
Meru(Berberatoday.com)-Guddoomiyaha Gobolka Meru ee uu Jaadka Kenya ka baxo, Peter Munya, ayaa ka hadlay Booqashadii uu dhawaan ku tagay Magaalada Hargeysa ee Caasimadda Somaliland, waxaanu sheegay inaanu Hargeysa u tagin arrimo siyaasadeed, ka dib markii Dawladda Soomaaliya joojisay Qaadkii Kenya uga tagi jiray dhanka Kenya, iyadoo ku sababaysay in Mr. Munya uu Hargeysa u tagay inuu ka shaqeeyo Aqoonsi ay Hesho Somaliland oo Madax-bannaanideeda 1991-kii kala soo noqotay Soomaaliya.
Munya, ayaa sheegay in aanu ka Qoomanayn doonin booqashadii uu dhawaan Hargeysa ku tagay, sababtii uu u booqdayna ay ahayd inuu suuq u raadiyo beeralayda Gobolka Meru ee dalka Kenya oo noloshoodu ay ku tiirsan tahay ganacsiga Qaadka ama Jaadka.
Sidoo kale, Safiirka Somalia u fadhiya dalka Kenya, Jamaal Hassan ayaa eedeyn u jeediyay Guddoomiyaha Gobolka Meru oo uu xusay inuu sababay cadaadis xoog leh oo la saaray Dowladda Federaalka Somalia taasoo sababtay in la joojiyo Qaadka ka taga Kenya ee gaadha Soomaaliya.
Balse, Munye oo ka hadlayay fagaare, ayaa gelinkii dambe ee Shalay xusay inaanu dhib u arkin booqashadii uu ku tagay Magaalada Hargeysa ee Somaliland.
“Waxaa is-weydiin leh, Ciidanka Peter Munya uu leeyahay oo fara-gelin kara Arrimaha dal ku yaalla gobolka halkay joogaan?” ayuu yidhi Peter Munya oo intaa ku daray. “Arrintaas waa mid dacaayad ah, Mana joojin doono inaan xaqa ay leeyihiin Beeralayda Gobolka Meru aan u raadiyo inay suuq u helaan Jaadkooda.”
Guddoomiyaha Gobolka Meru, ayaa xusay in ay tahay mas’uuliyadiisa inuu suuq uga raadiyo Dalka Somaliland iyo Waddamada kale, Balse ayna wax siyaasad ah ku lug lahayn.
Hadallada Ninkan, ayaa yimid ka dib markii sida uu isagu hore u sheegay ay Naftiisa halis ugu jirto Beeralayda Qaadka oo ku eedeeyay inuu sabab u yahay Qaadka Soomaaliya joojisay.
Berberatoday.com