|
|
Nairobi(Berberatoday.com)-Raysal wasaarihii hore dalka Kenya Mr. Raila Odinga, ayaa la filayaa inuu booqasho rasmi ah ku yimaado Jamhuuriyadda Somaliland todobaadka soo socda,
ka dib markuu martiqaad ka helay xukuumadda, sida ilo xog-ogaal ah u xaqiijiyeen DAWAN. Booqashada Mr. Odinga, oo xilligan ah hogaamiyaha xisbiga Mucaaridka ugu weyn dalka Kenya ee ODM oo dhowaan khudbad uu ka jeedinayey guriga Chatham ee Ingiriiska ku shaaciyey inuu aaminsan yahay in Somaliland xaq u leedahay madax-banaani ay caalamka ka hesho ayaa la sheegay inay ku wehelin doonaan saraakiil sar-sare oo xisbigiisa iyo baarlamaanka Kenya ka mid ah oo wada xaajood dhinacyo badan la yeelan doona madaxda Somaliland.
Sida ilo ku dhow xafiiska safaarada Somaliland ku leedahay dalka Kenya u xaqiijiyeen DAWAN, socdaalka weftiga Kenya ayaa ka dambeeyey ka dib markii uu bishii hore dalka yimi badhasaabka gobolka Miraa ee dalka Kenya oo u wehelinayey safiirka Somaliland ee Kenya Mr. Cabdillahi Cabdi Cali (Dhakaar).
Xogaha ilahaa ayaa intaa raaciyey in masuuliyiin xukuumada Somaliland ka tirsan iyo weftiga Kenya isla qaateen in wefti balaadhan oo xukuumada Kenya ah booqasho ku yimaadaan Somaliland, si labada dhinac uga wada xaajoodaan arrimo ay ka mid yihiin iskaashi dhica ganacsiga ah oo dhex mara iyo sidii bog cusub loogu furi lahaa wax wada qabsiga labada dhinac.