|
|
Madaxweynaha Jubbaland Oo Fagaare Kaga Khudbadeeyay Awaamiirtan Cusub
Kismaayo(Berberatoday.com)-Maamul-gobolleedka Jubbaland, ayaa awaamiir layaab leh ku soo rogay Lamaanayaasha doonaya in Arooskoodu ka dhaco Magaalada Kismaayo ee xarunta Jubbaland.
Madaxweynaha Jubbaland Axmed Madoobe oo Shalay Warbaahinta kula hadlayey Magaalada Kismaayo, ayaa Wiilka iyo Gabadha Arooskoodu ka dhacayo Magaalada Kismaayo uga digay in Arooskooda lagu gelbiyo Gaadiid ka badan Laba, kuwaasi oo kala ah Gaadhiga lagu qaadayo Aroosadda iyo Hal Gaadhi oo daba socda, halkii hore Aroosyada ka dhaca halkaa laguu gelbin jiray Gaadiid tiro badan.
“Hadduu Nin Aroos gelayo, lama ogola Gaadhiga uu ku qaadanayo Islaanta (Aroosadda) iyo Hal Gaadhi oo daba socda in ka badan.”ayuu yidhi, Madaxweynuhu waxaanu intaa ku daray oo uu Laamaha Ammaanka faray inay Xidhaan Arooska iyo Aroosadda Xafladda Arooskooda ay ka qayb-galaan Gaadiid ka badan Laba, “Hay’adaha amniguna ha qaataan Arooska boqolka Gaadhi la is-daba gelinayo inaan la qaadan kareynin, ee weliba Salaadda Makhrib lagu beegayo, ee xabadaha laga ridayo.”
Madaxweyne Axmed-Madoobe, wuxuu sheegay in hadda ka hor Ciidammada Ammaanku xidheen Aroos iyo Aroosad lagu gelbiyey Gaadiid ka badan laba, laakiin imika ka dib la xidhi doono Ehelka Lamaanaha is-guursanaya, “Hadda ka hor arrintaa waxaanu u xidhnay Arooska iyo Aroosaddaba, laakiin hadda ka dib waxay noqoneysaa in Soddohda iyo Soddoggaba lagu soo daro (oo la xidho) hadday Xabado (Ka dhacaan Arooska) ama sidaa loo dhaqmo..”ayuu yidhi.
Awaamiirtan, ayaa ah kuwa lagaga hor-tagayo Falal amni daro oo halkaa ka dhaca, maaddaama oo Fadhiisamada Kooxda Al-shabaab ku leeyihiin Deegaannada Jubbooyinka ee Soomaaliya ay kulaalayaan Magaalada Kismaayo ee Xarunta Maamulka Jubbaland ee Soomaaliya.
Berberatoday.com