|
|
Hargeysa(Berberatoday.com)-Wasiirka Wasaaradda Waxbarashada Somaliland Cabdillaahi Ibraahim Habbane (Cabdillaahi-dheere), ayaa sheegay in dhismaha Maktabadda Gaandi looga yagleelayo Gudaha Dugsiga Hoose/Dhexe ee Sheekh Bashiir ee Caasimadda Hargeysa lagu hirgelinayo amar Madaxweyne, laakiin aanay Cid gaar ahi ku danaysanaynin.
Wasiir Cabdillaahi-dheere oo Shalay dhagax dhigay Dhisme Maktabadda Gaandi leedahay oo Xukuumaddu uga hirgelinayso Gudaha dhismaha Dugsiga Sheekh Bashiir, ka dib markii dhismihii uu ku jiray ee Koonfurta Saldhigga dhexe ee Hargeysa lagu wareejiyey Ganacsadaha Ina Xarbi, ayaa sidoo kale ka hadlay Warar laga fidiyey Dugsiga Sheekh Bashiir.
“Amar Madaxweyne ayaanu ku shaqeynayaa, ee Cid gaar ah oo ka danaysatay ma jirto, halka aanu Maktabadda Gaandi u dhagax-dhignay ee (Gudaha Dugsiga Sheekh Bashiir), Markaa halkan (Sheekh Bashiir) Dawladda ka masuul ah, halkaana (Halkii laga soo raray Gaandi) Dawladda ka masuul ah, halkana Maslaxad baa loo dhagax-dhigay ee Cid bixisay ma jirto.” Ayuu yidhi, waxaanu intaa ku daray in Dugsiga Sheekh Bashiir aanu ahayn Dhaxal uu ka tagay Alle ha u naxariistee Sheekh Bashiir, balse Maamuus ahaan loogu Magac-daray, “Dusgiga Sheekh Bashiir maaha Dhaxal uu ka tagay Sheekh Bashiir ee Maamuus Dawladnimo ayaa loogu Magac-daray Dugsigan, Maamuuskiina waanu u haynaa, Ciddii dhaqdhaqaajinaysaa Maamuus-daro ayay la doonaysaa, Magacii Sheekh Bashiir waa sidii, Maktabadda Gaandi ayaa ku soo korodhay, waxaana wax ka baran doona Carruurta, waayo? Ardayda iyo Maktabaddu ma kala maarmaan.”
Berberatoday.com