|
|
Hargeysa(Berberatoday.com)-Dawladda Itoobiya ayaa ku eedeysay dowladaha Masar iyo Eritrea inay ku lug leeyihiin rabshadaha ka socda Gobollada ay degaan Qowmiyadaha Oromada iyo Amxaarada oo ah qowmiyadaha ugu badan dalka Itoobiya.
Wasiirka Warfaafinta Itoobiya Getachew Reda ayaa sheegay in dad shisheeye ay hubeynayaan kooxaha rabshadaha wata, isla markaana lacag siinayaan.
“Masar iyo Eritrea qeyb ayay ka yihiin rabshadaha, waxay dhaqaale iyo hub ku taageerayaan kooxaha qaswadayaasha”ayuu yidhii Getachew Reda.
Wasiirka Warfaafinta ayaa difaacay go’aanka dowladiisa ku soo rogtay xaalad deg deg ah, isagoo ku eedeeyay in kooxo dambiilayaal ah ay bartilmaameedsanayaan dadka rayidka ah.
Dadka dibad baxayaasha ayaa gubay warshado ku yaala gobollada ay rabshadaha ka socdeen, waxaana warshad ka mid ah kuwa la gubay ay sameyn jirtay shamiintada/Sibidhka, kaasoo uu leeyahay maalqabeen u dhashay dalka Nigeria.
Axadii la soo dhaafay ayay aheyd markii isu soo bax diimeed oo ka dhacayay Gobolka Oromada degto uu isu bedelay mid rabshado wata oo lagaga soo horjeedo dawladda.
Ciidamada ammaanka ayaa rasaas cirka ugu riday kumanaanka ruux ee isu soo baxay dibad baxa diimeed, waxaana Halkaasi ka dhashey isku dhacyo sababtay in ku dhowaad 50 ruux ay dhintaan.
Bilihii la soo dhaafay ayaa banaan baxyo ay sameynayaan qowmiyadaha ka soo jeeda Oromada iyo Amxaarada waxay dibad baxyo ay uga soo horjeedaan dowladda.
‘
Berberatoday.com