|
|
Berbera(Berberatoday.com)-Ugu Yaraan afar Qof ayaa ku dhintay Xanuunka Jadeecadda oo ka dilaacay deegaanka Laas-ciidle ee ka tirsan Gobolka Saaxil.
Saddex caruur ah oo da’doodu ka yartahay Shan jir iyo Gabadh 25jir ah ayaa la sheegayaa inay deegaankaasi u geeriyoodeen xanuunkaasi oo sii faafaya sida ay sheegayaan qaar ka mid xildhibaanada Gollaha deegaanka Berbera oo habeen hore cisbitaalka Magaalada Berbera ku booqday Bukaan xanuunkaasi u jiifa Cisbitaalka.
“Qaylo dhaan ayaanu halkan uga diraynaa Wasiirka caafimaadka iyo agaasimaha guud inay indhahooda kusoo arkaan dadka u dhintay xanuunka, Caafimaad daro, Abaar iyo Mid abaareed ayaa ka jirta Gobolkii Saaxil, Deegaanka Laas-ciidle dadbaa u dhintay Xanuunka Jadeecada oo sii faafaya markaa halaga soo gaadho dadka shacabka ah”ayay yidhaahdeen xildhibaano ka tirsan gollaha deegaanka Gobolka Saaxil oo habeen hore shir jaraa’id ku qabtay cisbitaalka guud ee magaalada Berbera.
Mid ka mid ah dhakhaatiirta ka hawgala Cisbitaalka Guud ee magaalada Berbera ayaa sheegay in haddii aan xanuunkaasi laga hor tagin uu ku faafi doono Shacabka intiisa kale.
“Xanuunadan uu Fayrasku keeno waxaa lagaga hortagi karaa Talaal, waxay ku faafi karaan dalka iyo meello kale oo ka baxsan dalka gudihiisa, Markaa waxaa jira dad badan oo kala qaaday Xanuunka jadeecada, dabadeedna u dhintay”ayuu yidhi Dhakhtarku.
Qaar ka mid ah cuqaasha Gobolka Saaxil oo warbaahinta la hadlay ayaa laamaha dawlada ugu baaqay in gargaar deg deg ah lala soo gaadho deegaanada uu xanuunkani ka dilaacay intaanu sii faafin.
Berberatoday.com