|
|
Marxuum Prof Axmed Cabdi Dacar Waxa Maanta Lagu Aasay Xabaalaha Xeedho Ee Waqooyiga Hargeysa, waxaana taariikhdiisa wax ka qoray Mulkiilaha ahna Guddoomiyaha Warbaahinta Himilo Madar Cabdi Axmed
Marxuum Prof Axmed Cabdi Dacar Oo Maanta Lagu Aasayo Xabaalaha Xeedho Ee Waqooyiga Hargeysa
Hargeysa, 23 Oct, 2016 (Himilo)-Illaahay Naxariistii Janno Ha ugu Deeqee oo iilka neecaw qabaw iyo haku siiyo narruuree, waxa habeen hore gurigiisa magaalada Hargeysa ku geeriyooday Marxuum Prof Axmed Cabdi Dacar oo ka mid ahaa aqoonyahanada ruug-cadaaga ah ee reer Somaliland ee sida weyn uga soo qayb qaatay Halgankii, Nabadeyntii, Dhismihii Qaranimada iyo Gooni isu taagii iyo Horumarka dalka Jamhuuriyada Somaliland.
Marxuum Prof Axmed Cabdi Dacar Illaahay Naxariistii Jannatul Fardawsa hawgu deeqee, waxa uu u geeriyooday xannuun kadis ah oo kusoo booday oo ka halleelay Wadnaha, sidaasi awgeed ayaa Meydka Marxuumka loo geeyey cusbitaalka guud ee Hargeysa, islamarkaana ilaa haatan loogu keydiyey qaboojiyaha Cusbitaalka, kadib markii ay codsadeen guud ahaan qoyskiisa oo ku kala sugan Waddamada Yurub in lala sugo Jinnaasada Marxuumka si ay uga qayb galaan Aaska Marxuum Prof Axmed Cabdi Dacar oo maanta oo Axad ah lagu aasi doono Xabaalaha Xeedho ee ku yaala duleedka Woqooyi ee Magaalada Hargeysa.
Tacsi
IN-NAA LILLAAHI WA IN-NAA ILAYHI RAAJICUUN
Geerida kadiska ee naxdinta leh ee ku timid Marxuum Prof Axmed Cabdi Dacar, ayaa guud ahaan ummadda Somaliland meel kasta oo ay joogaan ay ka naxeen, islamarkaana illaahay u baryeen inuu Marxuumka jannatul Fardawsa ka waraabiyo Qoyskii, Ehelkii iyo guud ahaan Ummaddii Somaliland ee uu ka baxayna Samir iyo iimaan saadiq ah uu ka siiyo. Aamiin.
Tacsi Madaxweyne
Madaxweynaha Jamhuuriyadda Somaliland, Mudane Axmed Maxamed Silaanyo, isagoo ku hadlaaya magaciisa, iyo kan shacabka Somaliland, waxa uu dhambaal tacsi ah u dirayaa, waayeelka, waxgaradka, aqoonyahanka, qoyskii, eheladii, qaraabadii, asxaabtii iyo Shacbiga Somaliland ee uu ka baxay ALLE ha u naxariistee Marxuum Axmed Cabdi Dacar oo ku geeriyooday Hargeysa 21/10/2016, oo aheyd Jimce.
Marxuumku waxa uu door muhiima ka soo qaatay dib u dhiskii dalka, iyo nabad kuwada noolaanshaha shacbiga Somaliland, waxaanu door muhiima ku lahaa Aas-aaskii dugsiga tababbarka macalimiinta ee ugu horreeyey Somaliland. waxaanu Madaxweynuhu si gaara uga tacsiyadaynayaa geerida Marxuumka Safiirka Somaliland u fadhiga Dalka Belgium oo uu walaalkii ahaa.
Madaxweynuhu waxa uu marxuumka Alle uga baryayaa inuu naxariistii janno ka waraabiyo, Waayeelka, Waxgaradka, aqoonyahanka, Qoyskii, Eheladii, Qaraabadii, Asxaabtii iyo shacbiga Somaliland ee uu ka baxayna Samir iyo iimaan saadiqa ka siiyo.
IN-NAA LILLAAHI WA IN-NAA ILAYHI RAAJICUUN
Xuseen Aadan Cige (Deyr)
Af-hayeenka Madaxtooyada JSL.