|
|
Libya(Berberatoday.com)-Boqolal qof oo muhaajiriin ah ayaa waxaa ay ku geeriyoodeeen badda Mediterranean ee u dhaxeysa dalalka Libya iyo Talyaaniga waxaana wararku sheegayaan in muhaajirintaas ay tiradoodu kor u dhaafeyso 230 qof .
Muhaajiriintan ayaa waxaa la degay laba doonyood oo ay saarnayeen isla markaana ay ka soo raceen xeebaha dalka Libya .
Hay’adda muhaajiriinta QM ayaa sheegtay in koox muhaajiriin ah oo ay ku jiraan 20 dumar ah iyo 6 caruur ah ay dooni yar ka raaceen xeebaha Libya Arbacadii, balse ay doonidaasi saacaddo kadib badda kula dagtay.
Wararka ayaa sheegaya in shaqaalaha gurmadka markii ay halkaasi gaadheen, inta badan kooxdaasi ay baddu liqday, waxaana la helay maydka 12 qof, oo ay ku jiraan saddex caruur ah. 27 qof ayaa la sheegayaa inay shilkaasi ka bad-baadeen.
Shil kalena, laba haween ah ayaa bad-baaday markii dooni ay iyaduna isla wakhtigaasi badda ku dagtay. Doonidaasi yar waxaa saarnaa 130 qof. Inta badan dadka ku dhintey labadan doon ayaa waxa ay ahaayeen tahriibayaal ka soo jeeda wadamada geeska Afrika.
Hay’adda IOM ayaa sheegtay in 4220 qof ay sannadkan badda Mediterranean-ka ku dhinteen, iyadoo sannadkii horena ay isla baddaasi ku dhinteen 3777 qof.
Berberatoday.com