Musharax Cabdiraxmaan Ciro Oo Dalka Ku Soo Laabtey Kana War Bixiyey Kulan Uu La Yeeshay Hogaamiyaha Khaatumo Cali Khaliif Galeydh +Muuqaal/ Sawiro.

November 7, 2016 - Written by Berbera Today

Hargeysa(Berberatoday.com)-Gudoomiyaha golaha wakiilada Somaliland isla markaana ah musharaxa madaxweyne ee xisbiga Waddani Cabdiraxmaan Maxamed Cabdilaahi Ciro ayaa galabta dalka ugu soo laabtey .

Musharaxa ayaa waxaa safarka ku wehelinaayey Ex Wasiir Cabdirisaaq Khaliif Axmed waxaana madaarka ku soo dhaweeyey saraakiil sar sare oo ka tirsan xisbiga Waddani

Muddane Ciro oo warbaahinta kula hadley hotel Ambasadoor ee magaalada Hargeysa ayaa waxaa uu ugu horeyn uu ka war bixiyey kulan uu magaalada Addis Abab kula yeeshay hogaamiyaha maamulka Khaatumo Cali Khaliif Galeydh .

Waxaa uu sheegay in ay guul tahay in wada hadal u furmo Somaliland iyo Maamulkaasi isla markaana uu u rajeynaayo in uu guul ku soo dhamaado waxaana uu mushaaxu xukuumada u soo jeediyey in wada hadalkaas aanay xukuumadu isku koobin balse talo qaran laga dhigo oo la balaadhiyo oo asxaabta iyo haayada kale laga qeyb galiyo .