Dacwaddan oo dhegeysigeedu socday muddo afar bilood ka badan,  isla markaana ay dammaanad ku joogeen Masuuliyiinta wargeyska HUBSAD ayaa shalay xayiraadii laga qaaday xaruntii wargeyska, mulkiilleyaashiina xorriyadoodii loo soo celiyey.  Xukunkan oo  uu ku dhawaaqay garsoore I Idiris Maxamed Muxumed oo isagu kiiska dacwadan qaadayay ayaa sheegay in  markii ay muddo dhegeysteen eedihii ay xeer ilaalintu ku soo oogtay iyo dooddii iyo difaacii qareennada Eedaysanayaashu ay  garwaaqsadeen inaanay wax dembi ah gelin masuuliyiinta wargeyska  HUBSAD oo kala ahaa Guddoomiyaha Wargeyskan Md.  Cadbirashiid Nuur Wacays iyo tifaftirihii wargeyska Siciid Khadar Cabdillaahi, kuwaas oo intii uu kiiskoodu socday iyagu dammaanad ku joogay dibada, sidaas oo ay tahayna  shalay laga bilaabo uu fasax yahay shaqadii uu wargeyskaasi yahay.

Maxaa lagu eedeeyey bahda HUBSAD?

Dacwaddan oo  sida xeer ilaalintu ku soo gudbisay asbaabta eedaynta Wargeyskan uu dhibane ka ahaa qaranku ,isla markaana ay eedaysaneyaal ka ahaayeen labadan xubnood  ayaa qoddobada loo haystay waxa akamid ahaa in ay sumcad dil iyo sharaf rid ku sameeyeen masuuliyiinta ugu sarreysa qaranka  iyagoo aan wax rusqad ah u haysan lahaanshiyaha wargeyskan, oo magac kale kaga diiwaan gashaanaa xeer ilaalinta. Hase yeeshee garsooraha ayaa sheegay in baadhitaan kadib ay ku ogaadeen inaanay caddayan eedaha loo haystaa. Fadhigii maxakamadda gobolku ay xukunka ku soo saartay kadib waxaa barxadda hore ee maxakamadda warbaahinta kula hadlay  Guddoomiyaha wargeyska HUBSAD Md. Cabdirashiid Nuur Wacays oo isagu xalay khadka telefoonka kula soo xidhiidhay Wargeyska HUBAAL ayaa u sheegay in wargeys ahaan ay u mahad naqayaan madaxda hay’adaha garsoorka  oo uu sheegay inay si cadaalad ah uga garsooreen kiiskan “ Runtii waxaan doonayaa caawa [xalay] inaan halkan uga mahad naqo  masuuliyiinta waaxda garsoorka oo uu ugu sarreeyo guddoomiyaha guddida cadaaladda qaranka ahna guddoomiyaha maxakamadda sare ee JSL  Garyaqaan Aadan Xaaji Cali Axmed,  iyo guddoomiyaha Maxakamadda gobolka Mr. Dalmar oo run ahaan  Kiiskayagan si cadaalad ah u maamulay muddadii uu socday, waxaanan leeyahay xukunkan maanta [shalay] laga soo saaray dacwaddii naloo haystay waxa uu noqonayaa mid ku yimi hoggaaminta toga nee bahda garsoorka uu ku hagayay Guddoomiye Aadan Xaaji Cali, waxaanu u horseedayaa  maamuus iyo milge ay ummadu u hayn doonto Guddoomiyaha iyo tiimkiisa.  Waxaa kale oo aanan sinnaba uu hilmaamayn isla markaana aan doonayaa  inaan isagana u mahad naqo garsoorihii qaaday kiiskayaga ee xukunka soo saaray Garsoore Idiris Maxamed Muxumed, oo xaqiiqatan  muddadii dacwaddu socotay si habsami  iyo daah furnaan leh u waday hawsha, aakhirkiina ku dhawaaqay xukun wax ku ool ah oo cadaynaya inaanaan wax dembi ah gelin,  eedaha nalagu soo oogayna ay jawrfal yihiin. Garsoore Idiris run ahaan adduun wuu u da’yar yahay, waafajintana alle ka sokow waxaa ay xaqsoornimadiisu u geli doontaa sunnaha nolosha iyo baalasha taariikhda”.

Berberatoday.com