Mr. Dhoolla-yare, ayaa sheegay inay illaa hadda garan la’yihiin Sababta Ismaaciil Hurre Buubaa oo ka noqday Mabda’ii Soomaali-weyn weli loogu eedeynayo inuu aanu aaminsanayn Qarannimada Somaliland, halka Siyaasiga Maxamuud Sifir oo isaguna Xilal ka soo qabtay Soomaaliya aan waxba laga sheegin Mabda’iisa ee weliba Xil looga Magacaabay Xukuumadda.

Dhoolla-yare oo Shalay saxaafaddu waydiisay waxay Xisbi ahaan ka qabaan eedaymaha ah inuu WADDANI ka mid yahay Ismaaciil Hurre Buubaa oo aan si rasmiya uga tanaasulin Mabda’ii Soomaali-weyn, ayaa ku jawaabay, “Adduunyada waxa jira Waxyaabo ay Mabnuuc tahay in Qofka lagu yidhaahdo, Maraykan oo kale waxa Mabnuuc ah in Qofka Madow lagu yidhaahdo Nigar, waxaana ka yaala Sharciyo ah inaan Qofka lagu takoorin Midabkiisa iyo Diintiisa. Markaa Xukuumadda KULMIYE waxaanu ku haysannaa oo aanu ka doonaynaa in Maxkamadda Sare iyo Guddida Anshu Xeer ka soo saaraan in Sifir Iyo Ismaaciil Hurre Buubaa oo laba Muwaadin ah Nina la yidhaahdo waa Federaalka (Soomaaliya) Nina uu Xil ka qabto Somaliland, markaa arrintaa Dacwad baanu ka qabnaa.” Ayuu yidhi, waxaanu intaa ku daray, “Xukuumaddu hadday dembi ku haysato Ismaaciil Buubaa ha caddeyso. Magaalada ayuu joogaa waa Muwaadin Reer Somaliland ah, Mabda’iisana wuu caddeeyay, markaa Xukuumadda waxaanu ka doonaynaa inay kala caddeyso Sababta ay Labadaa Nin midna Xil ugu dhiibeen, midna ay u leeyihiin waa Federaal.”

Siyaasiga Ismaaciil Hurre Buubaa, ayaan ilaa hadda si cad oo la wada ogyahay aan uga hadal inuu ka noqday Mabda’iisii Soomaaliya ee uu aaminsanaa.

Buubaa ayaa dhawaan ku biiray Xisbiga WADDANI, taasina waxay keentay in Dadka Muxaafidka ahi shaki geliyaan Mabda’a Xisbiga WADDANI ee Qarannimada Somaliland, maaddaama oo uu soo dhaweeyay Ismaaciil Hurre Buubaa oo aan weli Aragtida uu ka qabo Madax-bannaanida Somaliland aanay caddeyn.

Berberatoday.com