Guddoomiye Axmed Maxamed, ayaa intaa ku daray in goor maqrib ku dhawaad ah in diyaarad millatari oo aan la garanayn cid leh in ay soo fadhiisatay deegaanka Bariisle isla markii ay soo fadhiisatayna ciidanka qaranka oo ka ag dhawaa goobta ay ku soo degtay diyaaraddu in ay ka hawl galeen kuna dhaqaaqeen laakiin intii aanay gaadhin ayay dib u kacday oo ay u duushay dhanka dalka Jabuuti.

Waxaanu sidaa ku sheegay guddoomiyaha gobolka Selal waraysi uu xalay khadka taleefanka ku siiyay wargeyska DAWAN, isagoo ku sugan magaalada Lawyacaddo.

Guddoomiyaha oo aanu waydiinay socdaal uu shalay dalka Jabuuti kaga soo noqday iyo arrimaha uu u tegay, waxaannu yidh, “Waxaan dalka Jabuuti u tegay in aanu ogaano diyaarad Millatari oo ah kuwa qumaatiga u kaca oo habeen afraad makhribkii soo fadhiisatay deegaanka Bariisle ciddii lahayd iyo ujeeddada ay u socotay hawshaas ayaan u tegay Jabuuti waxaanan u sii marnay Safaaradda Somaliland ee aynu ku leenahay Jabuuti.”

“Horta wakhtiga ay soo fadhiisatay waxay ahayd goor habeen ah oo shaacu madoobaaday oo makhrib ku dhawaad ah ayay ahayd, markii ay soo degtayna waxa ku dhaqaaqay oo ku baxay ciidanka qaranka oo halka ay soo fadhiisatay ku dhawaa laakiin intii aanay gaadhin ayay kacday. Waxaanay u duushay dhanka dalka Jabuuti oo ay markii horena ka timi markaa illaa imika baadhis ayaanu wada wadnaa dalka Jabuuti oo aan u tegay arrinta diyaaraddaas iyo cidda leh soo ogaanshiyaheeda.

Dawladda Jabuutina si wanaagsan ayay uga hawl gashay markaa Jabuuti waxay noo sheegtay in aanay diyaaraddaas iyagu lahayn laakiin ay badhitaan samaynayaan oo ay xaqiijinaaan dalka laga leeyahay iyo sababta ay Somaliland ugu soo xad gudubtay ee ay u soo fadhiisatay ugana noqotay iyadoo dadka watay aanay cidna la kulmin,”ayuu yidhi Guddoomiyaha Gobolka Selal.

Berberatoday.com