Gabiley(Berberatoday.com)-Maamulka Gobolka Gabiley iyo Degmada Gabiley, ayaa Maanta Gobollada bariga u diray 85 Gaadhi oo Caleen ah, kuwaasi oo hor-dhac u ah illaa 200 oo Gaadhi oo Caleen ah oo Gobolku kaga qayb-qaadanayo Abaarta Gobollada bariga Somaliland.

Badhasaabka Gobolka Gabiley Xamse Maxamed Cabdi, oo ugu horeyn ka hadlay Madashii laga ambo-bixiyey Gaadiidka Caleenta u qaaday Gobollada abaareysan ee Bariga, ayaa yidhi, “Waxaanu direynaa Maanta 85 Gaadhi oo Bal ah oo hordhac ah, annaga oo ballan-qaadnay inaanu Gurmadka Abaarta kaga qayb-qaadanno laba boqol oo Lawdh.” Ayuu yidhi, Badhasaabka Gobolka Gabiley, waxaanu intaa ku daray, “Gobolka Gabiley waa Gobolka keliya ee Abaaraha Gobollada bariga uga qayb-qaatay sida ugu culus. Gobolku wuxuu marti-geliyey Dadka ka soo baro-kacay Gobollada bariga ee Abaartu ka jirto, Dadkaasi oo dhan 15000 kun oo Qoys. Dadkaa si wanaagsan baa loo soo dhaweeyay, oo Beerihii baa loo furay, Dadkii bay daaqii la wadaageen, Biyihiibaa la siiyey, imikana waxaanu diraynaa waxaanu direynaa Dadkii soo kici kari waayay inaanu meeshooda wax ugu geyno.”