|
|
“Qaxootiga Yemen ka Imanaya waala Joojiyay, cudurka Daacuunka ayaa ka Dilaacay dalkaas”W. Caafimaadka
“Waxaanu arrinkaasi kala soconaa ma Jirto”W. Dib u Dajinta Somaliland
Hargeysa(Berberatoday.com)-Khilaafka ka dhashey qaxoontiga kasoo cararay dalka Yemen, ayaa ka dhex bilaabmay wasaaradaha Caafimaadka iyo Dib u Dajinta Somaliland.
Khilaafkan ayaa ka dhashey kadib markii wasaaradda Caafimaadka Somaliland sheegtay in la joojiyay qaabilaada qaxootiga ka imanaya dalkaasi Yemen maaddaama Haayada qaramada Midoobay u qaabilsan Caafimaadku shaacisay in dalkaasi uu ka Dilaacay Cudurka Daacuunku.
“Wasaaradda Caafimaadku iyadoo la kaashanaysa laamaha ay khuseeyaan qaxoontigu waxay joojisay Dhamaan dadka Qaxootiga ee ka Imanaya dalka Yemen”ayuu yidhi Agaasimaha waaxda caafimaadka ee wasaarada Caafimaad Abiib Aadan Nuur waxaanu intaasi ku daray “Arrinkani maaha mid wasaaradda caafimaadka oo kaliya khuseeya shirbaa laga yeeshay oo waa mid qaran, mar haddii u cudur si fudud kusoo gaadhi karo somaliland waxaanu go’aansanay in dadkaasi la joojiyo”
Dhinaca kale Agaasimaha Guud ee wasaarada Dib u Dajinta Somaliland oo wax laga waydiiyay go’aankaasi kasoo baxay wasaarada Caafimaadka ayaa uu sheegay inaanay wasaaradiisu waxba kala socon dadkaasi la joojiyay.
“Wax la tashiya oo arrinkan ay wasaaradda caafimaadku nagala soo sameysay ma jiro, horena waan ugu gudbiyaya agaasimaha iyo wasiirkaba in arrinkan aan ka wada shaqayno markii ay qaxoontigu soo bilaabmayeen laakiin waxba nalooma soo sheegin waxbana kama ogin”sidaas ayuu yidhi agaasimaha wasaarada Dib u dajinta Somaliland.
Dooni siday Qaxooti kasoo cararay dalka Yemen ayaa Toddobaadkii hore wasaarada Caafimaadku diiday inay dadkaasi yimaadaan Somaliland balse arrinkaas waxaa ka Horyimid masuuliyiinta wasaarada Dib u dajinta iyadoo markii dambe Doontaas loo ogolaaday in kusoo xidhato dekada Magaalada Berbera islamarkaana qaxootigaas la qaabilo.
Berberatoday.com