|
|
Somaliland siyaasadeedu waxay ku dhisantahay hab deegaan oo salka ku haysa Nidaamka Beelaha ama Qabaailka iyo kolba inta ood wadaaga ahi samayso is xulufaysi siyaasadeed oo lagu gaadho guusha kursiga lagu hantiyo.
Hadaba iyadoo taasi jirto damaca siyaasiga waa laysku qabtaa oo layskaga horyimaadaa. Waxa dhacday oo taariikhdu xusaysaa dagaal siyaasadeed oo dhex maray waqtigii uu mucaaridka ahaa M.weyne Siilaanyo iyo Gudoomiye Saleebeen Gaal oo isku deegaan ah; balse aakhirkii heshiiyay gacmahana is qabsaday lagumana ceebaysan wixii hore dhex marayna halkaas waxa kusoo afjarmay xurguftii siyaasadeed ee mudada badan ka dhaxaysay, Heshiiskaas oo door wayn ka ciyaaray guushii M.weyne Siilaanyo kasoo hooray doorashadii 26 June 2010.
Sidoo kale waxa dhacay in Siyaasada ay aad ugu kala foogaayeen Dr. Gaboose iyo Gud. Cirro oo hal deegaan kasoo wada jeeda, Tartan adag ayaa dhex maray kadib markii mid waliba furtay Urur Siyaasadeed aakhirkiina sababtay in markii Wadani xisbi qaran noqday, lasoo afjaray dagaalkii heshiis siyaasadeedna dhexmaray Gaboose iyo cirro gacmaha isqabasadeen laguna balamay in midba ka kale dhiso siyaasad ahaan.
Sidaas darteed waxaan sheekadan uga gol leeyahay maxaa ku jaban ama ceeb ka dhigay in Jamaal Cali xuseen iyo Muuse Biixi heshiin karaan gacmahana is qabsan karaan siyaasad ahaana dhiso. Mise xaalku waa Maroodigu Takarta Saaran Ma Arko ee Kan Kale Takarta Saaranbuu Arkaa. Waxaan kusoo afmeerayaa hadii talaabadii ay qaadeen Gud. Saleebaan iyo Dr. Gaboose oo siyaasiyiin waa wayn mid la mid ah uu qaado Jamaal Cali Xuseen maxaa ku jaban…!
Alaa Mahad Leh
Qalinkii. Aw Faarax Tukaale.
Hargeysa/ Somaliland