|
|
Wajaale(Berberaday.com)-Alle ha u naxariistee waxa Maanta la helay Meydka Gabadh Magaceeda lagu sheegay Raxma Aw Aadan, taasi oo Shantii Maalmood ee u dambeeyay la raadinayey.
Meydka Gabadhan oo laga helay Kuus Caleenta Xooluhu Cunaan lagu dhex qariyey, ayaan illaa hadda la garanayn Cidda dishay isla-markaana Meydkeeda qarisay, wallow Booliisku sheegay in loo hayo Hal Nin oo ku eedeysan dilkeeda.
Falkan oo ka dhacay Deegaanka Idhanka Jufada oo hoos taga degmada Tog-wajaale ee Gobolka Gebilay, ayaa markii Booliisku Meydkeeda heleen waxa Saxaafadda la hadlay Taliyaha qaybta Booliiska ee Gobolka Gabiley, waxaanu sheegay in Gabadha la raadinayey muddo Toddobaad ku dhow.
Taliyaha oo faahfaahinaya raacdada ay ugu jireen Gabadhan ay Meydkeeda heleen, ayaa yidhi, “Gabadhan waxa Maalmahanba raacdadeeda ku jiray Ciidanka Booliiska iyo Maamulka Gobolka Gebiley, nasiib wanaag waxaanu soo helay Meydkeeda, Ninkii (Dilkeeda) lagu eedeynayeyna waanu haynaa, kiiska Dilkeedana Baadhistiisa ayaanu wadnaa, markaa Dadku ha is-dejiyaan.”
Badhasaabka Gobolka Gebiley Xamse Maxamed oo isaguna ka hadlay Dilka Gabadhan, ayaa Tacsi u diray Ehelkii iyo Qaraabadii ay ka baxday, waxaanu yidhi, “ILAAHAY ha u naxariisto Marxuumadda, Ehelkeedana Samir iyo iimaan haka siiyo, Gacan ka xaq-daran baa dishay.”
Badhasaabku waxa kale oo uu sheegay oo uu yidhi, “Gabadhu waxay ahayd Hooyo leh 8 Carruur ah oo ka ugu yari jiro 2 Sannadood.”
Berberatoday.com