|
|
Hargeysa(Berberatoday.com)-Masuuliyiin ka tirsan Maamulka Puntland ayaa gudaha Somaliland gaar ahaana deegaano ka tirsan Gobolka Sool ka bilaabay hawlgalo ay ka taageerayso hay’adda WFP.
Wasiirka arrimaha gudaha iyo dawladaha hoose ee maamulka puntland Axmed Cilmi Cismaan(Axmed Karaash) ayaa deegaanka Tukaraq oo qiyaas ahaan 53Km dhinaca bari kaga beegan magaalada Laascaanood ee xarunta gobolka Sool ka furey mashruuc maamulkaasi ugu magac daray wax ka qabashada abaaraha .
Shan kun oo qoys ayaa loogu tala galay mashruucan in ay ka faa’idaystaan kaas oo ay ku deeqday hay’adda cuntada aduunka ee WFP (United Nation World Food Programmew) kaas oo guud ahaan laga bilaabay deegaano badan oo hoos yimaada gobolka Sool oo ay kamid tahay deegaanka Tukaraq.
Wasiirkii daah furayay mashruucan ee lagu magacaabo Axmed cilmi Cismaan)Axmed Karaash) ayaa ka dhawaajiyey in deeegaanka Tukaraq ka tirsan tahay maamulka Puntland isaga oo sheegay inay maamulka Puntland ay deegaankan Tukaraq u noqon doonto xarun laga caawiyo dadka abaaruhu saameeyeen.
Maamulka Puntland ayaa mudooyinkii u danbeeyey gudaha dalka somaliland ka waday faro galin qaawan,iyada oo ay xusid mudan tahay in dhawaana ay magaalada Laascaanood ku dhex sugnaayeen wasiiro iyo xildhibaano ka tirsan maamulkaasi Puntland.
Dawlada Somaliland gaar ahaana wasaaradda arrimaha gudaha somaliland ayaan iyadu ilaa hadda ka hadal faro galinta qaawan ee ay maamulkani ka dhex wadaan gudaha dalka Somaliland.
Berberatoday.com