“Annaga oo ah Culimada Suudiyada Ee Dariiqada Ahlu Sunna Wal-jamaaca ee Magaalada Boorama waxaanu baaq u direynaa Madaxweynaha Jamhuuriyadda Somaliland Axmed Maxamed Maxamuud (Silaanyo), baaqayagu wuxuu yahay Masaajidka Magaalada Berbera ee Boqol sannadood in ka badan Culimada Ahlu-sunna Waljamaaca ay gacanta ku hayeen, Dadkana ay Diinta ugu barayeen Lacag la’aan, in Maanta Wasiirka Wasaaradda Diinta iyo Awqaaftu uu qaato Go’aan ah in laga Wareejiyo Culimadaas.” Ayuu yidhi, Mid ka mid ah Culimada Suufiyada oo ugu shirkaa Jaraa’id ka hadlay, waxaanu intaa ku daray, “Madaxweynaha waxaanu gu baaqaynaa inuu ka fiirsado Go’aankaas oo ah Mid Baadil ah. Madaxweyne Arrintu markay tahay Muran diimeed waa Arrin Cajiib ah, Wasiirka Diintuna Go’aan khaldan buu qaatay, waana dhinac. Tan iyo markii aad Wasiirkaa u Magacowday Diinta iyo Awqaafta wuxuu marayaa Lix Masaajid. Ahlu Sunna Wal-jamaaca waa Dad, Dalka iyo Diintaba Jecel, waa Dad Nabadeed oo Madaxdooda u hoggaansan.”

Xubin kale oo ka mid ah Culimada Shirka Jaraa’id ku qabtay Magaalada Boorama, ayaa sheegay in Culimada Suufiyadu meel kasta oo ay joogaan ay ka xun yihiin in laga Wareejiyo Masaajidka Sheekh Isaxaaq ee Magaalada Berbera, waxaanu yidhi, “Waxaanu ka codsanaynaa Cid kasta oo khuseyso in si deg-deg ah wax looga qabto Xukunka Baadilka ah ee Culimada Ahlu Sunna Waljamacaa lagaga wareejiyey Masaajidka Sheekh Isaxaaq ee Magaalada Berbera. Wasaaradda Diintu iyadaa Meesha keensatay Guddida (ka xukuntay Ahlu Sunna Waljamaaca), waxay sameeyeen in Magacii Masaajidka oo ahaa Sheekh Isaxaaq inay ku beddelaan Xaaji Yuusuf Iimaan. Markaa haddii aanu nahay Culimada Ahlu Sunna Waljamaaca aad baan uga soo horjeednaa Xukunkaa.”

Berberatoday.com