Somaliland: Ciidammada Nabadgalyada Waddooyinka Iyo Booliiska Oo Wada-jir U Bilaabay Hawl-gallo Lagu Dhimayo Shilalka Gaadiidka
January 9, 2017 - Written by Berbera Today
Hargeysa(Berberatoday.com)-Ka dib, markii Ciidammada Nabadgalyada Waddooyinka Somaliland ay qiimayn ku sameeyeen Shilalkii Sannadkii hore ka dhacay Somaliland, isla-markaana ogaadeen in Shilalkii Dalka ka dhacay 2016-ku ay ka badan yihiin kuwii Dalka ka dhacay Sannadkii 2015-ka, ayaa waxay Booliisku ka bilaabeen Guud ahaan Magaalooyinka Somaliland Hawl-galo lagu eegayo Liisamada Dirawaliinta Gaadiidka, Buugga Gaadhiga, Xawaaraha Gaadhigu ku socdo, Turusyada Gaadiidka ku xidhan iyo Hoonka dheer ee Gaadiidka.
Sidaana waxa ku dhawaaqay Afhayeenka Ciidammada Booliiska, ahna Taliyaha Ciidammada Nabadgalyada Waddooyinka Gaashaanle Sare Faysal Xiis Cilmi, waxaanu yidhi, “Maanta oo ay Taariikhdu tahay 8 bisha koowaad, 2017-ka (Shalay) Ciidammada Nabadgalyada Waddooyinka oo kaashanaya Ciidamada Booliiska Somaliland waxay Hawl-gal ballaadhan ka bilaabi doonaan dhammaan Gobollada Somaliland, gaar ahaan Awdal, Saaxil, Maroodi-jeex, Gabiley iyo Togdheer, Hawl-galkaa waxa lagu qab-qaban doonaa Gaadiidka Xawaaraha dheer ku socda, Gaadiidka sita Turusyadii la Mabnuucay, Hoonka dheer ee Magaalooyinka Gudahooda lagu Garaaco, Dhaafidda Gaadiidka ee keena Shilalka aadka u badan, Liisan la’aanta, Buug la’aanta iyo kuwa aan sharciga lahayn,Sababtoo ah Waxaad la socotaan in Shilalkii aad iyo aad u bateen 2016-dii, iyadoo taa laga duulayo Taliska Ciidammada Booliisku waxay amreen in gobollada Dalka oo dhan laga sameeyo Hawl-galkaasi.”