Dhallinyaro Reer Somaliland Ah Oo Ka Mid Noqday Tahriibayaal Ku Geeriyooday Dooni Ku Gadoontay Mediterranean-ka
January 22, 2017 - Written by Berbera Today
Hargeysa(Berberatoday.com)-Dhallinyaro reer Somaliland ah ayaa ka mid noqotay tahriibayaal ku naf waayay dooni toddobaadkan ku gadoontay biyaha miditerenianka oo ka baxday xeebaha Liibiya.
Doonidan oo laga badbaadiyay dhawr qof oo isugu jiray Itoobiyaan iyo Ereteriyaan ayaa waxay siday dad gaadhaya 180 ruux oo u badnaa dalalka bariga Afrika, waxaanay badankoodu noqdeen kuwo ku naf waayay biyaha, ka dib markii ay doonidii macmaclka ahayd ee ay saarnaayeen qaraqantay.
Haddaba, warar soo baxay oo laga helay dalka Liibiya ayaa sheegaya in doonidan ay saarnaayeen dhallinyaro reer Somaliland ah oo ka soo kala jeeday Hargeysa iyo Burco. Dhallinyaradan oo aan weli magacyadooda la xaqiijin ayaa waxa ay ka mid ahayeen dhallinyaro ka hayaantay dalka oo u sii jeeday qaaradda Yurub.