Masaajid Ku Yaala Dalka Canada Oo Weerar Lagu Qaadey , Cida Weerarkaas Qaadey Iyo Tirada Dadka Lagu Dilay

January 30, 2017 - Written by Berbera Today

Canada(Berberatoday.com)-Ugu yaraan afar ruux ayaa ku dhimatay rasaas lagu furay masaajid ku yaalla magaalada Quebec ee dalka Kanada.

Rasaasta ayaa lagu furay Xarunta Dhaqanka Islaamka ee Quebec habeenimadii Axadda, sida ay booliisku sheegeen.

Facebook-ga xaruntaas yaa la soo dhigay booliis taagan bannaanka goobta ay wax ka dhaceen, waxaana muuqaalkaas lagu soo dul qoray dhimasho ayaa jirta.

Booliiska magaalada Quebec ayaa sheegay in ay xidjeen labo ruux laakiin wali faahfaahin dheeri ah kama aysan bixinin dhimashada iyo dhaawaca.

Goobjooge ayaa wakaaladda wararka ee Reuters u sheegay in saddex ruux oo hubaysan ay ka qaybqaateen weerarkan, isla wakaaladduna waxay ku warantay in ay masaajidka galeen askar hubaysan oo ku xeel dheer xeeladaysiga.

Rasaasta ayaa ka dhacday masaajidka oo ku yaala chemin Sainte-Foy, oo ka mid ah labo masaajid oo ay gacanta ku haysto Xarunta Islaamka.

Booliiska ayaa isku gadaamay masaajidka, baraha ay bulshadu ku xiriirtana waxaa la soo dhigay muuqaal muujinaya tiro gawaarida gurmadka degdega ah.