|
|
Muqdisho(Berberatoday.com)-Waxaa faah faahin dheeraad ah laga helayaa Qarax khasaare geystay oo duhurnimadii maanta ka dhacay Isgoyska Kaawo-godey ee Degmada Wadajir, sida ay inoo sheegeen saraakiil ka tirsan NISA.
Qaraxan oo loo adeegsaday Gaari walxaha Qarxa laga soo buuxiyay ayaa waxa uu si gaar ah uga dhacay Maqaaxi laga cunteeyo oo ku taalla Isgosyka Kaawo-godey ee Degmada Wadajir.
Inta la xaqiijiyay ku dhowaad 40 Qof ayaa ku dhimatay, halka tiro intaa ka badana ay ku dhaawacmeen, sida ay sheegeen saraaskiisha ammaanka Dowladda Federaalka.
Xilliga uu Qaraxa dhacayay ayaa waxa ay aheyd goobta mid mashquul badan, maadaama Maqaaxida dad badan ay ka qadeynayeen, sidoo kalena goobta lagu iibiyo Qaad ama Jaadka.
Gaadiidka gurmadka deg dega ah ayaa waxa ay gaareen goobta, si ay u soo qaadaan dhaawacyada halkaasi yaalla, si loo gaarsiiyo Isbitaalada oo xaaladooda caafimaad wax looga qabto.
Ciidanka ammaanka ayaa waxa ay xireen goobta uu Qaraxa ka dhacay, iyagoo dadka ku amraya in ay goobta ka fogaadaan, maadaama la diiyo in la daawado Meydadka.
