|
|
Hargeysa(Berberatoday.com)-Xildhibaan Saleebaan Cali Koore oo ka mid ah Mudaneyaasha Golaha Wakiillada Somaliland, isla-markaana ka mid ahaa Xildhibaanno dhawaan deegaanka Xidh-xidh kulan kula yeeshay Cali Khaliif Galaydh, ayaa sheegay inuu Cali Khaliif u aqoonsan yahay inuu dhib ku yahay Somaliland.
Xildhibaan Koore oo Shalay Saxaafadda kula hadlay Hargeysa, ayaa sheegay inaanu ogeyn wax heshiis ah oo dhex maray Somaliland iyo Kooxda Khaatumo ee uu hoggaamiyo Galaydh, sidaa darteedna illaa uu Cali Khaliif Galaydh qiro xuduudaha Somaliland uu u aqoonsan yahay inuu Somaliland dhib ku yahay.
Xildhibaan Saleebaan oo Arrimahaa ka hadlayaana wuxuu yidhi, “Illaa hadda wuxuu Cali Khaliif sheeganayaa inuu joogo Xukuumad la yidhaahdo Khaatumo, markaa illaa uu yidhaahdo reer Somaliland-baan ahay waxaan u aqoonsanahay inuu yahay Ninkii dhibta waday, Cid kastaa hala xaajootee, markaa ma ogi Cid uu Heshiis la galay.”
Xildhibaanku wuxuu sheegay in Galaydh uu illaa hadda aaminsan yahay in Khaatumo tahay Maamul jira, “Maaha in Somaliland laga dhigo Xukuumad ku hoos jirta Xukuumad. Markaa illaa uu noqdo Nin reer Somaliland ah oo uu qiro in Dalkan Sharci iyo Xuduudo jiraan Anigu waxaan u aqoonsanahay Nin Somaliland dhib ku ah.”ayuu yidhi.
Berberatoday.com