|
|
Hargeysa(Berberatoday.com)-Xildhibaan Maxamed Xirsi Obama oo katirsan mudaneyaasha aqalka wakiillada, ayaa dhaliilo u jeediyey goleyaasha deegaanka dalka, waxana uu sheegay inay horsed ka yihiin bilic-xumada iyo weliba cambaaraynta dhinaca adeegga bulshada ah ee xukuumadda loo jeediyo.
Xildhibaan Obama oo arrimaha muddo-kordhinta ee hay’adaha ay goleyaasha deegaanku kamid yihiin loo sameeyey ka hadlay, ayaa sheegay inaanay is lahayn lacagta ay goleyaasha deegaanku maamulaaan iyo sida ay shaqadoodu fadhiidka u tahay, waxana uu yidhi, “Golaha deegaanku waa gole maamula $30,000,000(soddon milyan) oo dollar, waana gole ka masuul ah dhaliilo badan oo xukuumaddu leedahay oo looga baahan yahay inuu magaalooyinka quruxdooda iyo sharaftoodaba ka masuul ah.”
Isaga oo hadalkiisa sii wata waxa uu sheegay in haddii ay goleyaasha deegaanku kuraasida sii fadhiyayaan looga baahan yahay inay nidaamka ay maanta u shaqeeyaan wax badan ka beddelanaan oo ay umadda u shaqeeyaan,“Golaha deegaanku waa gole dhaliilo faro badan loosoo jeedinayo oo aanu jecelahay haddii ay meesha sii joogayaan inay habka ay u shaqeeyaan wax ka beddelaan, haddii kale waxa ay kamid noqon doonaan meelaha qarankani ka dumay,” ayuu yidhi xildhibaan Obama.
Goleyaasha deegaanka ee dalka, ayaa dorraad loogu dhawaaqay muddo-kordhintii ugu horraysay tan iyo intii la doortay sannadkii 2012-kii, waxase si is-daba joog ah usoo kordhaya dhaliilaha loo jeedinaya ee dhinaca adeegyada ay qabtaan ah, waxana weli taagan muran xoogan oo golaha deegaanka ee caasimadda kala dhexeeya ururka warshedaha biyaha iyo sharaabka ee dalka oo aan weli la xallin, isla markaana riiq dheeraaday.
Berberatoday.com