|
|
London(Berberatoday.com)-Arsenal ayaa si rasmi ah usoo bandhigtay inay heshiis la gashay laacibka baasha bidix uga ciyaara Schalke ee Saed Kolasinac oo si toos ah u tegi doona Emirates 1 July.
Difaacan bidix oo u dhashay waddanka Bosnia oo ay da’diisu tahay 23 jir, ayaa si xor ah ugu biiri doona Gunners maadaama uu dhamaaday heshiiskii uu kula jiray Schalke 04, taas oo Wenger u suurtogelinaysa inuu helo ciyaartoy uu u baahan yahay oo aanay lacagi kaga bixin.
Schalke ayaa barteeda Twitterka ku xaqiijisay inuu Kolasinac ka tegay, waxaanay uga mahad-celisay qaybtii uu ku lahaa bandhig ciyaareedkii kooxda lixdii sannadood ee uu u ciyaarayay, taas oo xili ciyaareedkan uu ka caawiyey inay kaalinta 10aad ee Bundesliga gasho, isla markaana ay gaadho wareegga afar dhamaadka Europa League oo ay reebtay Ajax.
Dhinaca kale, Kolasinac oo la hadlay website-ka Arsenal ayaa sheegay inuu ku faraxsan yahay inuu xidho funaanadda Gunners oo ah koox leh dhaqan ciyaareed oo wanaagsan, uuna daawan jiray wakhtigii uu yaraa Jens Lehmann iyo Thierry Henry.
Berberatoday.com