|
|
Puntland(Berberatoday.com)-Maamul-gobolleedka Puntland, ayaa sheegay in uu isku soo dhiibay mid ka mid ah Dagaalyahannada Kooxda sheegata in ay xidhiidh la leedahay DAACISH ee ku sugan Buuraha Galgala.
Shaqsigan isa soo dhiibay ayaa magaciisa lagu sheegay Cabdillaahi Maxamed Siciid, oo ka soo jeeda Gobolka Baay ee Dalka Soomaaliya, sida ay sheegeen Saraakiisha Amaanka ee Puntland.
Axmed Maxamuud Yuusuf oo ka mid ah Ciidammada Puntland ee fadhiisimaha ku leh Duleedka Buuralayda Galgala, ayaa Idaacadda VOA u sheegay in ninkan uu isagu qirtay in uu ka tirsan yahay kooxda Daacish.
Sarkaalkan ayaa intaa ku daray in ninka isa soo dhiibay aanay illaa hadda ka haynin Wareysi faah faahsan, balse ay dib ka soo sheegi doonaan, isagoo Ragga kale ee weli ka tirsan Kooxda Daacish ugu baaqay in ay isa soo dhiibaan.
Ciidamada maamulka Puntland ayaa marar badan koox ka tirsan Daacish waxaa ay kula dagaalameen deegaanno ka tirsan degmada Qandala ee gobolka Bari.
Kooxda Daacish ayaa sanadkii hore waxay la wareegtay degmada Qandala, kuwaasi oo in muddo ah halkaasi ku sugnaa, inkastoo markii dambe laga saaray..
Berberatoday.com