|
|
Hargeysa(Berberatoday.com)-Weriye Maxamed Xasan Cali (Weji) oo ka mid ah Ruug-cadaaga Saxaafadda Somaliland, ayaa si kooban uga warramay Aqoontii Alle ha u naxariistee Maxamed Maxamuud Axmed (Mijir-qaaddi) oo ka mid ahaa Raggii lagu bilaabay Idaacadaha Radio Hargeysa iyo Radio Muqdisho isla-markaana Muddo Nus-qarni ah Shaqada Saxaafadda ku soo jiray.
Alle ha u naxariistee Mijir-qaaddi oo 3-dii bishan Julay, 2017-ka ku Geeriyooday Magaalada Burco, laguna aasay, ayaa waxa Aqoontiisii Saxaafadda Maanta ka warramay Weriye Maxamed Xasan Cali (Weji) oo hadal ka jeediyey Hadhimo-sharafeed uu Guddoomiyaha Xisbiga KULMIYE Maanta u sameeyay Qaar ka mid ah Saxaafadda Somaliland.
Weriye Weji oo Arrimahaa ka hadlayaana wuxuu yidhi “Alle ha u naxariistee MIJIR-QAADDI wuxuu ka mid ahaa Tiir ka mid ah Tiirarka aasaasay Saxaafadda Afka Soomaaliga ku hadasha. Wuxuu ahaa Raggii u badheedhay saxaafadda, iyadoon aanu jirin iskuul ay uga soo baxeen, Cid u tababbartay jirin, Af-Soomaali jirin, wuxuu ka mid ahaa Suxufiyiintii Waraaqo Af-Ingiriisi ku qoran intay Makarafoonka (Idaacadda) la Hor-fadhiistaan Tarjumaad toos ah samayn jiray (ee Wararka ku soo tabin jiray)..”
Waxa kale oo uu sheegay in Marxuum Mijir-qaaddi ka mid ahaa Suxufiyiintii lahaa Eray-bixinta Afka Soomaaliga ee loo adeegsado War-tabinta, “Wuxuu ahaa Raggii lahaa 80% Tarminoolajiga ama Eray-bixinta (Afka Soomaaliga) ee aynu Idaacadaha ama Telefiishannada kaga hadalno (kalmadaha sida gaarka ah loogu adeegsado War-tabinta)”ayuu yidhi.
Berberatoday.com