|
|
Lowyacaddo(Berberatoday.com)-Inta la xaqiijiyey Hal Qof oo Rag ah ayaa ku Naf waayey Danab ka dhashay Roob dabaylo watay oo Shalay Gelinkii hore ka da’ay Tuulada Lowyacaddo ee Gobolka Selel ee Somaliland.
Sidaana waxa Wargeyska Himilo u xaqiijiyey Maamulka Lowyacaddo iyo Qaar ka mid ah Dadweynaha halkaas ku dhaqan oo aanu Xalay Khadka Telefoonka kula xidhiidhnay, si aanu wax uga ogaano Masiibadda halkaasi ka dhacday.
Mid ka mid ah dadweynaha ku nool tuulada Lawyacado oo ku sugnaa agagaarka Goobta uu danabku ku soo dhacay oo Wargeyska HIMILO u warramaya ayaa waxa uu yidhi “Shalay subax, saacaddu markii ay aheyd tobankii subaxnimo ayuu dhinaca badda roob ka soo kacay, xilligaasi oo ah xilliga ay dadku sida aadka ah isugu tallaabaan (Somaliland iyo Djibouti).
Waxa kale oo uu sheegay “Walaal, Roobkaasi markii uu da’ayey daqiiqado kooban kadib ayuu yeeshay dabaylo iyo daadad, dabadeedna danab ayaa ku soo dhacay goobta loo yaqaano lama-degaanka ee u dhaxaysa kaantaroollada Somaliland iyo Djibouti, sidaasi awgeedna waxa uu danabkaasi ku dhacay goob ay marayeen saddex qof oo kala ahaa ruux dumar ah oo alaab sidatay iyo laba nin oo kaaryoonleyaal watay oo alaabta u soo qaaday haweenaydaasi, sidaasi awgeed ayuu mid ka mid ah raggaasi ku naf waayey danabkaasi, waxaana magaciisa la odhan jiray Marxuumka Cabdillaahi Cismaan Faarax (Daafato), halka ay miyir doorsan ku jirto haweenaydii, balse aanu waxba noqon ninkii kale. Inta aan ogohay amase aan arkayeyba”.
Dhinaca kalena, Wargeyska Himilo oo khadka Telefoonka kula xidhiidhay Guddoomiyaha Tuulada Lawyacado Md Siciid Cabdiraxmaan Cilmi, oo ku sugan magaalada Borama ayaa xaqiijiyey dhimashada ninkaasi waxaanu yidhi “Waa qaddar ILAAHAY, oo nimco waliba waxay leedahay nusqaan, walaal shalay aroortii roob ayaa ka da’ay Lawyacado, wax yar kadibna danab ayaa kusoo dhacay meel la yidhaahdo lama-degaanka sidaasi awgeedna waxa uu halleelay rag murruq maal ah oo goobtaasi marayey, waxaana ku naf waayey hal nin, ILAAHAY naxariistii janno hawgu deeqee”.
Guddoomiyaha Tuulada Lawyacado waxa uu intaasi ku daray “Ma jirto khasaare kale oo mood iyo nool ah oo uu geystay danabkaasi, xaaladda Tuuladuna haatan way fiican tahay”.
Ugu dambayntiina, Siciid waxa uu sheegay in Marxuumkaasi Xalay lagu aasay Tuulada Lawyacado, waxaanu tacsi u diray qoyskii iyo qaraabadii uu ka baxay Marxuumkaasi.
Berberatoday.com