|
|
London(Berberatoday.com)-Dawladda Britain ayaa waxa maalintii Arbacadii shalay soo bandhigtay muuqaal muujinaya laba Nin oo rasaas ku furay Aabo iyo laba carruur ah oo uu dhalay.
Dhacdadan ayaa waxay ka dhacday degmada Newham ee bariga magaalada london, ciidammada ammaanka ee dalkaasi ayaa shaaciyay ballan qaad ah in cidda xogo ku saabsan labadaasi Nin amase goobta ay ku sugan yihiin usoo gudbisa inay ku abaalmarin doonaan lacag dhan 26 kun oo dollar.
Aabaha ay labadani Nin ee budhcada ahi xabada ku fureen ayaa waxa magaciisa lagu sheegay Haaruun Xuseen da’diisuna tahay 32 jir, Haaruun ayaa ka badbaaday dilka badheedhka ah ee labadaasi Nin ay kula kaceen, balse nasiib wanaag Haaruun muu geeriyoon, laakiin dhaawacyada soo gaadhay ayaa ah kuwa u diiday socodka isla markaana ay xaaladiisa caafimaad halis ku jirto, Haaruun ayaa waxay labadaasi nin ku rideen 12 xabadood.
Haaruun Xuseen ayaa ah ganacsade kula nool qoyskiisa magaaladaasi, waxaanay ciidammada ammaanku sheegeen in ilaa iyo haatan la garanayn sababta labadaasi nin usoo weerareen Haaruun, balse tan iyo markii falkaasi dhacay bishii June ee sanadkii hore ayaa waxay ciidammada ammaanku ku jireen baadigoob ay ku raadinayeen labadaasi nin, laakiin ilaa iyo haatan wax xog ah oo laga hayo halka ay ku sugan yihiin ma jirto, waana sababta ku kaliftay ciidammada ammaanku inay muuqaalkaasi baahiyaan.
Berberatoday.com