|
|
Jeddah(Berberatoday.com)-Siyaasadda dalka Boqortooyada Sucuudiga ayaa muddooyinkan dambe laga dareemayey isbeddal hor leh, isbedalkaasi oo saameeyay dhammaan mujtamaca dalkaasi, sidoo kale haweenka u dhashay dalkaasi ayaa helay siday sheegayaan xuquuqo kala duwan oo aanay hore u heli jirin.
Tartan kubbada kolleyga ah ayaa lagu qabtay magaalada Jeddah, gaar ahaana garoonka Al-jawhara ee magaaladaasi.
Qabanqaabada tartankan ayaa waxa iska kaashaday wasaaradda Caafimaadka ee dalkaasi iyo Ururka la dagaalanka Cancer-ka naasaha ee dalkaasi, Diina Caarif oo ka mid ah qabanqaabiyayaasha tartankani kana tirsan ururka la dagaalanka Cancer-ka naasaha ayaa wareysi ay siisay shabakada Al-arabiya oo Wargeyska Himilo ka soo xigtay ayaa waxay tidhi “Hadafka koowaad ee aan tartankan u qabanay waxa uu yahay in aan haweenka ku dhiiri galino ciyaaraha noocyadooda kala duwan lacagta ka soo xeroota tartankana waxaanu dib ugu celinaynaa dhakhaatiirta si loogu dayac tiro”.
Diina Caarif ayaa sidoo kale sheegtay in tartankaasi ay ka soo qayb galeen haween aad u tira badan, tirada haweenka ka soo qayb halay furitaanka tartankaasi ayaa waxay ku sheegtay in ka badan saddex kun oo haweena.
Tartankan ayaa noqonaya kii ugu horreeyay ee noociisa ah ee ka dhaca gudaha dalkaasi, waxaanu astaan cad u yahay isbeddalka uu dhaxal sugaha boqortooyada dalkaasi Maxamed Bin Salmaan uu ugu ballan qaaday shacabka dalkiisa.
Berberatoday.com